Վարչապետ Նիկոլ Փաշինյանը հրապարակել է ստեղծված իրավիճակից դուրս գալու ճանապարհային քարտեզ, ներկայացրել մի շարք առանցքային կետեր, մասնավորապես՝ ապահովել արցախցիների վերադարձն իրենց հայրենի օջախներ, զոհված զինծառայողների ու քաղաքացիների ընտանիքների սոցիալական երաշխիքների ապահովում, պատերազմի ընթացքում Հայաստանի տարածքում տուժած բնակելի և հանրային կառույցների ու ենթակառուցվածքների վերականգնում, կորոնավիրուսի հաղթահարում, տնտեսական ակտիվության միջավայրի վերականգնում, ժողովրդագրական խնդրի լուծման ծրագրերի ակտիվացում։
Նպատակադրումները ոչ թե լավն են, այլ տեղին են, բայց ինչպե՞ս ենք հասնելու այս ամենին․ «Առաջին լրատվական»-ի հարցին ժողովրդագրագետ Արտակ Մարկոսյանը պատասխանեց․ «Գիտեք, խնդիրները նախ պետք է շատ արագ քարտեզագրել։ Այսինքն՝ արագ ուսումնասիրություններ է պետք անցկացնել, բայց մենք առաջնային խնդիր ունենք, դա մեր հայրենակիցներն են, որոնք թուրք-ադրբեջանական ագրեսիայի հետևանքով ստիպված լքել են իրենց բնակավայրերը և գտնվում են Հայաստանի տարածքում։
Պետք է հասկանանք, թե ինչ ենք կորցրել մենք Լեռնային Ղարաբաղում։ Այո, այսօր Լեռնային Ղարաբաղում կան տարածքներ, որտեղ մարդիկ չեն կարող վերադառնալ՝ Ադրբեջանի հսկողության տակ են։ Եթե արդեն խոսվում է, որ Քարվաճառը պետք է տրվի, ապա այնտեղ բնակվում է մոտ 3500 մարդ, որոնք պետք է լքեն իրենց բնակավայրերն ու բնակություն հաստատեն Հայաստանի Հանրապետությունում։ Բերձորի տարածքում ունեինք գյուղեր, որոնցից փաստացի պետք է մեր հայ բնակչությունը դուրս գա։ Իսկ մյուս տարածքներում, թեկուզ խաղաղապահներ են տեղակայված, այնուամենայնիվ, ժամանակ է պետք, որպեսզի մարդիկ համոզվեն, որ այնտեղ իսկապես անվտանգ է»։
Մանրամասները՝ տեսանյութում։
