Թուրքական Zaman թերթի փոխանցմամբ՝ Թուրքիայի նախագահ Աբդուլլահ Գյուլը մեկնաբանել է սիրիական Համա քաղաքի վերջին արյունալի իրադարձությունները, որոնց զոհ է գնացել 150 մարդ։ Գյուլը նշել է, որ քաղաքի գրոհի ժամանակ սիրիական բանակի ցուցաբերած դաժանությունն իրեն գցել է սարսափի մեջ.
«Ոչ վաղ անցյալի իրադարձություններն ավելի ուժեղացրին մեր անհանգստությունը, որն առանց այդ էլ մեծ էր։ Համայի իրադարձություններն ազդել են իմ հոգեվիճակի վրա՝ առաջացնելով խոր շոկ։ Անհնար է արդարացնել Բաշար Ալ-Ասադի գործողությունները։ Այն ժամանակ, երբ մենք նրանից ակնկալում էինք արմատական փոփոխություններ, Ռամադանի շեմին ստացանք այդպիսի արյունալի պատկեր»։
Հիշեցնենք, որ Սիրիայի ղեկավարությանը քննադատել է նաև Թուրքիայի արտգործնախարար Ահմեդ Դավութօղլուն. «Մենք Սիրիայի ղեկավարությանը կոչ ենք անում ուժ չկիրառել սեփական ժողովրդի դեմ, բնակչությանը հնարավորություն ընձեռել՝ խաղաղ ճանապարհով ներկայացնելու իր արդար պահանջները և իրականացնել խոստացված բարեփոխումները։ Թուրքիան մշտապես աջակցելու է սիրիական ժողովրդին սեփական ապագան կառուցելու հարցում»։
