«Իմ քայլը» խմբակցության նախկին պատգամավոր Էդգար Առաքելյանը ֆեյսբուքյան իր էջում գրել է.
Ասում ես չգրես, չի ստացվում։
Հասկանո՞ւմ են արդյոք 17-յակի մասնակիցները, նրանց հովանավորած ու նվագակցած առանձին գործիչները, որ ողջ այս պատերազմի ամենավճռորոշ ճակատամարտի ամենավճռորոշ րոպեներին անելով իրենց հայտնի հայտարարությունը՝ իրենք իրենց դատապարտեցին հայ ժողովրդի մի ստվար հատվածի հավերժական կասկածներին առ այն, որ բոլոր տարածքային ու մարդկային կորուստների, ռազմական ձախողումների իրական մեղավորը պատերազմի հենց սկզբից իրենց դավաճանական վարքագիծն ու դիվերսիոն գործունեությունն է եղել բանակի շարքերում։
Անգամ եթե դա սուտ է, անգամ եթե 180 աստիճան հակառակն է իրականությունը, մեր ժողովրդին շատ լավ ճանաչելով՝ կարող եմ վստահորեն պնդել, որ նրանք այդ խարանն արդեն իսկ վաստակել են։
Հավատացեք, սա ցանկացած ցմահ բանտարկությունից կամ մահապատժից էլ դաժան բան է։ Դեռ քանի սերունդների պիտի դառնացած պատմեն, որ չէր լինի այն ինչ եղավ, եթե չլիներ պառակտումն ու հակազգային գործունեությունը։ Կրկնում եմ՝ հնարավոր է՝ 100 տոկոսով անհիմն, 100 տոկոսով սուտ, բայց դա լեգենդ է դառնալու ու չի վերանալու։ Իհարկե, սրա կողքին անխուսափելիորեն կլինեն նաև այլ լեգենդներ։ Կապրենք, կհամոզվենք։
Բայց մեղավոր են միայն իրենք, որ գործեցին անհեռատես կամիկաձեների նման։ Ու ոչ մի նշանակություն չունի՝ կհասնե՞ն ի վերջո իրենց հետապնդած նպատակներին, թե ոչ։ Մարդկանց մտքերը կառավարել հաստատ չեն կարողանալու։
