Հայաստանում 2021 թվականի պետական բյուջեի նախագծով 2020 թվականի համար կանխատեսվում է 6 տոկոս տնտեսական անկում, իսկ 2021-ի համար՝ 4.8 տոկոս աճ: ԱԺ մշտական հանձնաժողովների համատեղ նիստերում «ՀՀ 2021 թվականի պետական բյուջեի մասին» ՀՀ օրենքի նախագծի քննարկման ժամանակ այս մասին հայտնել է ՀՀ ֆինանսների նախարար Ատոմ Ջանջուղազյանը: «Ներկայացված նախագծով 2020 թվականի համար կանխատեսվում է տնտեսական աճի բացասական 6 տոկոս մեծություն, իսկ 2021-ի համար այն գնահատված է 4.8 տոկոս»,- ասել է Ջանջուղազյանը:
«Առաջին լրատվական»-ի հետ զրույցում տնտեսագետ Արմեն Քթոյանը նշեց՝ տնտեսական կանխատեսումները սովորաբար հիմնված են լինում երկու խոշոր բաղադրիչների վրա՝ քանակական ու որակական։ Թե որքանով են իրատեսական 2021 թվականի 4,8 տոկոս տնտեսական աճի կանխատեսումները, տնտեսագետը նշեց. «Եթե մենք դիտարկենք քանակականը, ապա ֆինանսների նախարարությունն ունի որոշակի սցենարներ, թե որ դեպքում ինչ կլինի։ Նույն կորոնավիրուսային համավարակի պարագայում իրենք ունեն որոշակի կանխատեսում կամ ենթադրություն, և 2021 թվականի տնտեսական աճի հիմքում դրված են այդպիսի ենթադրությունները։ Ես հիմա պատրաստ չեմ ասել, թե իրենք ինչ ենթադրություններ են դնում, բայց տնտեսական աճի հիմքում կան հենց այդպիսի ենթադրություններ»։
Գալով որակական բաղադրիչին՝ տնտեսագետը նախ ասաց, որ այս տարվա տնտեսական անկումը պայմանավորված է երկու խոշոր ցնցումով՝ կորոնավիրուսային համավարակ և պատերազմ։ Մեր զրուցակիցը չի կարծում, թե 2021 թվականին այս երկու բաղադրիչները կշարունակեն գործել ու ազդել տնտեսության վրա։ «Չեմ կարծում, թե իրատեսական է համարելը, որ այդ երկու գործոնների ազդեցությունը կլինի նաև 2021 թվականին։ Եթե մենք բացառում ենք այդ երկու գործոնները, ապա վերադառնում ենք զարգացման այն տրամաբանությանը, որը կար 2019 թվականին։ Այստեղ կարող ենք ևս մեկ որակ ավելացնել, որ մենք ունենք ավելի հասուն հասարակություն, ավելի միասնական ու համախմբված, նպատակասլաց: Դա ևս որակական բաղադրիչ է։ Չպետք է մոռանանք, թե հետպատերազմյա վերականգնման ինչ լավ օրինակներ կան՝ Գերմանիա, Կորեա, Ճապոնիա։ Այս երկրները մի քանի տասնամյակի ընթացքում զրոյից կարողացան կառուցել բարեկեցիկ երկրներ, ինչը եթե որևէ քանակական մեթոդով գնահատեինք, չէր ստացվի»,- մանրամասնեց Արմեն Քթոյանը։
Տնտեսական գործոնների առումով տնտեսագետն ընդգծեց՝ այս իրավիճակում մենք պահում ենք տնտեսական, բյուջետային կայունություն, դրամի փոխարժեքի էական փոփոխություններ չկան, ունենք պահուստային նշանակալի մեծություն, կան պայմանագրեր Արժույթի միջազգային հիմնադրամի հետ, մի քանի հարյուր միլիոն դոլարի արտարժութային բարձիկ ունենք, որը վճարային հաշվեկշռի հնարավոր խնդիրների դեպքում հնարավոր կլինի լրացնել։
«Ինչու չէ՝ նաև ունենք «Հայաստան» համահայկական հիմնադրամի գործոնը, հանքարդյունաբերություն ունենք, որը կարող է ֆորսմաժորային իրավիճակում կարճաժամկետ առումով մեզ փրկել։ Այո, պատերազմը՝ պատերազմ, COVID-ը՝ COVID, բայց մենք դեռևս ունենք հաղթաթղթեր, որոնք հնարավորություն են տալիս ապահովել տնտեսական կայունություն։ 6 տոկոս անկումը, այո, նախորդ տարիների նկատմամբ զգալի է, բայց մյուս կողմից՝ այս մարտահրավերների համատեքստում կործանարար կամ աղետալի չէ։ Մենք պահում ենք կայունությունը 2020 թվականին, ինչը հավատ է ներշնչում, որ 2021 թվականին տնտեսական աճ կարող ենք ունենալ»,- ընդգծեց տնտեսագետ Արմեն Քթոյանը։
