«Ֆոսֆորային զինատեսակների դեպքերը և հետևանքները ուսումնասիրվում են: Դրանք ամբողջացնելու պարագայում մենք կներկայացնենք», – ճեպազրույցի ժամանակ ասել է ՀՀ ՊՆ ներկայացուցիչ Արծրուն Հովհաննիսյանը՝ անդրադառնալով այն տեսանյութերին, որոնք տարածվում են այս օրերին՝ փաստելով, որ Ադրբեջանն անցել է արգելված զինատեսակների կիրառության:
Հավհաննիսյանը հիշեցրել է, որ այսօր օրվա ընթացքում Ստեփանակերտի ու Մարտունու ուղղությամբ Ադրբեջանը կիրառել է հրթիռային ու հրետանային միջոցներ, ավիացիա՝ խաղաղ բնակչությանը ռմբակոծելու համար: Հովհանիսյանն ասել է, որ հետևյալ հանգամանքի վրա է ցանկանում ևս մեկ անգամ աշխարհի ուշադրությունն հրավիրել։
«Ադրբեջանն ընտրովի գերճշգրիտ զինատեսակներից հարվածներ է հասցնում խաղաղ բնակչությանը:
Արցախի ԶՈՒ սպառազինության մեջ գտնվող հաճախ հին, խորհրդային արտադրության զինատեսակները կարող են ունենալ որոշակի շեղում և խիտ բնակեցված քաղաքներում տեղակայված ռազմական լեգիտիմ օբյեկտներին խոցելու ժամանակ շեղման պատճառով կարող է տուժել խաղաղ բնակչությունը, որի առիթով Արցախի ռազմական և քաղաքական ղեկավարությունը նույնիսկ հայտարարություն կատարեց, և Ադրբեջանը կարող էր սեփական քաղաքացիների անվտանգությունն ապահովելու համար ձեռնարկեր հատուկ գործողություններ:
Այսինքն՝ ասել է թե, Արցախը որևէ նպատակ չունի խաղաղ բնակիչներին հատուկ վնաս պատճառելու:
Նույնը չի կարելի ասել Ադրբեջանի մասին, որը կիրառելով գերճշգրիտ զինատեսակներ, որոնք կարող են ունենալ մեկ-երկու մետրի շեղում, ինչը մենք հաճախ տեսնում ենք, որոշ ռազմական օբյեկտները խոցելիս, գովեստի խոսքերն են վերցնում, բայց մոռանում են, որ այդ նույն զինատեսակներով քաղաքացիական օբյեկտներ են թիրախավորում: Ստեփանակերտի ծննդատուն, Ստեփանակերտի հոսպիտալ, Մարտակերտի հոսպիտալ, Շուշիի եկեղեցի, չենք կարծում, որ գերճշգրիտ զենքերով պատահական են խոցում եկեղեցին, պատահական են խոցում ծննդատունը»,- ասել է Հովհաննիսյանը:
