«Հայելի» ակումբում այսօր հյուրընկալված ԱԺ ՀՀԿ խմբակցության պատգամավոր Լեռնիկ Ալեքսանյանը և քաղաքագետների միության նախագահ Հմայակ Հովհաննիսյանը անդրադարձան Հայ ազգային կոնգրես – իշխանություն երկխոսության թեմային:
Հ.Հովհաննիսյանը սխալ է համարում իշխանության ներկայացուցիչների, մասնավորապես Գագիկ Մինասյանի այն հայտարարությունը, թե ստեղծվել է «ինստիտուտ»: «Եղբայր, ո՞վ է ձեզ լիազորել ինստիտուտ ձևավորել»,- հարց ուղղեց քաղաքագետը՝ նկատելով, որ նման ինստիտուտներ ձևավորելը Սահմանադրությանը հակասում է, և հղում կատարեց Սահմանադրության 5-րդ կետին, թե պաշտոնյաները ինչ լիազորություններով են օժտված: «Եթե ուզում եք ինստիտուտ ստեղծել՝ հարցը դրեք հանրաքվեի, տեսնենք՝ ժողովուրդը կո՞ղմ է, որ այդպիսի ինստիտուտ ստեղծվի»:
Լրագրողների դիտարկանը ի պատասխան, թե դրանք աշխատանքային խմբեր են, քաղաքագետը դարձյալ հղում կատարեց Գ.Մինասյանի նույն հայտարարությանը՝ շարունակելով. «Եթե ստեղծվել է այս հակասահմանադրական ձևաչափը, ընդդիմությունը, որը համարում է, որ սա ավազակապետություն է, որ Սահմանադրությունը չի գործում, ներքաշեց իշխանությանը այնպիսի գործընթացի մեջ, երբ իշխանությունը, ըստ էության, իր քայլերով ապացուցում է, որ ինքն էլ է համաձայն, թե մեզանում չկա սահմանադրական կարգ, չկա իրավական պետություն: Բերեք այդ ընդդիմությանը խորհրդարան և այնտեղ Սահմանադրությանը համապատասխան կարող եք քննարկել ցանկացած հարց»:
«Առաջին լրատվական»-ի դիտարկմանը, թե արդյո՞ք Հմայակ Հովհաննիսյանը նույն մտահոգությունները ուներ, երբ Սերժ Սարգսյանը մի քանի տասնյակ կուսակցությունների ղեկավարների էր հրավիրել քննարկումների, նա պատասխանեց. «Սա աշխատանքային խումբ է… Բա որտեղի՞ց է այս խորհրդավորությունը, բա որտեղի՞ց են մեկնաբանությունները, բա որտեղի՞ց է այդ Կառավարության ընդունելությունների տունը…»: Հ.Հովհաննիսյանը կարծում է, որ Ս.Սարգսյանի հրավիրած հավաքը երկխոսության համար էր ստեղծված, իսկ այսօր «մշտապես գործող մարմին է ստեղծվել»: «Առաջին լրատվականը» Հ.Հովհաննիսյանին հիշեցրեց, որ «մշտապես գործող մարմին» չի ստեղծվել, այլ Կոնգրեսի կողմից ստեղծվել է պատվիրակություն, որը իշխանության հետ պետք է քննարկի կոնկրետ հարց՝ արտահերթ ընտրությունների նշանակման հարցը՝ կոնկրետ ժամկետներում: Հ.Հովհաննիսյանը, սակայն, դարձյալ օրինակ բերեց Գագիկ Մինասյանի հայտարարությունը, որ իշխանության և ընդդիմության միջև ստեղծվածը «ինստիտուտ» է:
Լեռնիկ Ալեքսանյանն իր հերթին նկատեց, որ ընթանում է երկխոսություն, այլ ոչ թե բանակցություններ Կոնգրեսի հետ։
«Հանրապետության նախագահը հայտարարեց, որ եթե խնդիրներ կան՝ այս խնդրով կարող եք դիմել այս պաշտոնյային, այն խնդրով՝ մյուսին… Այդ իսկ պատճառով ստեղծվեց աշխատանքային խումբ, որովհետ ճիշտ չէր լինի, եթե պետական պաշտոնյան բանակցությունների գնար քաղաքական ուժի հետ: Երկխոսությունը քաղաքական ուժերի միջև է»,- ասաց ՀՀԿ-ական պատգամավորը: Այստեղ Հ.Հովհաննիսյանը հակադարձեց, թե Կոնգրեսի պահանջից հետո հայտարարվել է, որ կոալիցիայի ներկայացուցիչները ներկայացնում են գործադիրին, օրենսդիրին և Սերժ Սարգսյանին: «Այսինքն՝ ստեղծվում է մի մարմին, մի պատվիրակություն, և նախագահը, խորհրդարանը իրենց լիազորությունները փոխանցում են այդ մարմնին: Սահմանադրության մեջ չկա նման բան… Սա «պերեվարոտ» է, սա հեղաշրջում է, սա հեղաշրջման սկիզբ է Սերժ Սարգսյանի և Լևոն Տեր-Պետրոսյանի կողմից…»,- նշեց Հ. Հովհաննիսյանը՝ հավելելով, որ Հայաստանը հայտնվել է հակասահմանադրական հեղաշրջման իրավիճակում:
«Առաջին լրատվական»-ի դիտարկմանը, թե Հայ ազգային կոնգրեսը հստակ ամրագրել է, որ մինչև սեպտեմբեր պարզ կլինի՝ արդյոք իշխանությունները պատրա՞ստ են արտահերթի, թե՞ ոչ, եթե ոչ, ապա երկխոսությունը կհամարվի սպառված: «Ճիշտ է: Ուրեմն հակասական են ՀԱԿ-ի մոտեցումները: Ես էլ իրենց ասում եմ՝ խելքի աշեցեք, հա է՝ հա, չէ է՝ չէ, և վերջացրեք այս ֆարսը, որովհետև մի հարց կարող եք քննարկել, որը Սահմանադրությանը համապատասխանում է: Այն է՝ ուժերի հաշվեկշիռը փոխվել է, մենք, հասարակությունը պահանջում եք, որ քաղաքական ներկապնակը համապատասխանի հասարակական տրամադրություններին, և գնանք արտահերթ ընտրությունների»,- ասաց քաղաքագետը:
