Օրերս Ադրբեջանի նախագահ Իլհամ Ալիևի հետ տեղի ունեցած համատեղ մամլո ասուլիսի ժամանակ Թուրքիայի վարչապետ Էրդողանը քննադատության է ենթարկել Հայաստանի նախագահ Սերժ Սարգսյանին, որը Ծաղկաձորում աշակերտներից մեկի հարցին ի պատասխան ասել է. «Ղարաբաղը մենք վերցրինք, իսկ Արարատ լեռան վերցնելը թողնում ենք ձեզ»։
ՀՅԴ Բյուրոյի Հայ դատի և քաղաքական հարցերի գրասենյակի պատասխանատու Կիրո Մանոյանը, անդրադառնալով այս հեռակա բանավեճին, նկատեց, որ Էրդողանը մի քանի ամիսը մեկ պետություն է փնտրում է, որին ներկայացնում է ներողություն խնդրելու պահանջ:
«Այն հայտարարությունը, որն արեց Էրդողանը Բաքվում, չէր համապատասխանում նրան, որն արել էր մեր նախագահը, բայց նաև մեր նախագահի չարձագանքելը Էրդողանին ճիշտ չէր»,- կարծիք հայտնեց Մանոյանը:
Մանոյանը նկատեց, որ Ալիևի հայտարարությանը Սերժ Սարգսյանի պատասխանը համարժեք էր, սակայն ճիշտ չէր ընդհանրապես անտեսել Էրդողանի ասածները և բավարարվել փոխարտգործնախարարի պատասխանով, որ ևս խոցելի էր. «Դա ճիշտ կեցվածք չէ և հավելյալ հոխորտալու առիթ կտա Թուրքիային: Լռությունը Էրդողանի հայտարարության հանդեպ հասկանալի չէ»:
