«Իմ կարծիքով՝ Հոկտեմբերի 27-ի ոճրագործությունը տեղի է ունեցել էլի Ղարաբաղի հիմնահարցի պատճառով: Վստահ եմ, որ եթե Հոկտեմբերի 27-ը չլիներ, դժվար թե Ադրբեջանը մտածեր, որ կարող է մի օր քնից արթնանալ ու պատերազմ սկսել, կամ շատ երկար կմտածեր նման քայլ անելուց առաջ: Ակնհայտ էր, որ ոտքի էինք կանգնում, ուժ էինք հավաքում և այլ հնարավորությունների ու հզորությունների բանակ էինք ունենալու: Եվ հավանաբար նաև մեր էդ մեղքի համար է, որ այս պատերազմը չի վերջանում: Գոնե պետք է կարողանանք այս անգամ վերջակետ դնել»,- օրվա խորհրդի մասին լրագրողների հետ զրույցում իր կարծիքը հայտնեց «Հանրապետություն» կուսակցության քաղխորհրդի նախագահ Արամ Սարգսյանը:
Նրա խոսքով՝ հողը, հայրենիքը պաշտպանել է պետք, և յուրաքանչյուր մարդ ինքը պետք է որոշի՝ ինչպես պաշտպանի հայրենիքը. «Այս պատերազմը որոշակի ժամանակ տևելու է, և պետք է սովորել ապրել նաև այս պատերազմի պայմաններում»:
Ինչ վերաբերում է վարչապետի նախօրեին արած հայտարարությանը «ցավոտ զիջումների» մասին, Արամ Սարգսյանն ասաց. «Մեր բոլոր իշխանություններն էլ խնդիրը դրել են փոխզիջումների մեջ, ուղղակի ամեն անգամ Ադրբեջանը մի քիչ ավելին է ուզել: Ու հիմա ուզում է կամ ամբողջը, կամ ոչինչ: Վարչապետի ասածը սա էր»:
Մանրամասն՝ տեսանյութում: