Լոնդոնում տեղակայված իրավապաշտպան Syrian Observatory for Human Rights կազմակերպությունը հայտնում է, որ սիրիական Իդլիբում ռուսական ավիահարվածի արդյունքում սպանվել է առնվազն 78 իսլամիստ գրոհային: Այս մասին հաղորդվում է կազմակերպության կայքում: Ռուսաստանի Պաշտպանության նախարարությունն այս տեղեկությունը չի մեկնաբանել:
Իրավապաշտպանների խոսքով՝ հարվածը հասցվել է Թուրքիայի սահմանի մոտ գտնվող «Ֆայլակ աշ-Շամ» խմբավորման զինյալների ճամբարին, որը գտնվում է Հարիմ բնակավայրի տարածքում: BBC- ն նշում է, որ մահացածները Թուրքիայի կողմից աջակցվող խմբավորումներից էին:
Զեկույցում ասվում է, որ ավիահարվածի արդյունքում զոհերի թիվը կարող է աճել, քանի որ վիրավորներից մի քանիսը գտնվում են ծանր վիճակում: Ընդհանուր առմամբ, հարձակման ընթացքում վիրավորվել է 90 մարդ:
Իրավապաշտպանները նշում են, որ ներկայիս ավիահարվածը զոհվածների թվով ամենամեծն էր՝ մարտին կնքված զինադադարից ի վեր, ըստ որի՝ սիրիական բանակը տարածաշրջանում դադարեցրել էր իր հարձակումը:
BBC- ն նշում է, որ այս հարձակումը կարող է վտանգել հրադադարի մասին համաձայնագիրը, որի շուրջ բանակցություններ են վարվել Անկարայի և Մոսկվայի միջնորդությամբ, որոնք աջակցում են Սիրիայում հակամարտության հակառակ կողմերին:
Վերլուծաբանները կարծում են, որ ներկայիս օդային հարվածը կարող է համարվել նախազգուշացում Մոսկվայի կողմից Թուրքիայի նախագահ Ռեջեփ Էրդողանին, որն աջակցում է Ադրբեջանին՝ Լեռնային Ղարաբաղում Հայաստանի հետ հակամարտությունում: Syrian Observatory for Human Rights կազմակերպությունը հաղորդել է, որ «Ֆայլակ աշ-Շամի» որոշ զինյալներ ուղարկվել են Ղարաբաղ՝ մասնակցելու հակամարտությանը Բաքվի կողմից:
