Ամերիկյան հեղինակավոր The Wall Street Journal պարբերականում հրապարակվել է Ալեքսանդր Տորեպլոյի «Nabucco-ի ճակատագիրը կախված է Ադրբեջանից» խորագրով հոդվածը, որում նշված է, որ Ռուսաստանից ԵՄ-ի ունեցած գազային կախվածության կրճատման ցանկացողների համար շատ կարևոր է Ադրբեջանի դիրքորոշումը.
«Մինչև տարեվերջ ակնկալվում է, որ Ադրբեջանն ընտրություն կկատարի սեփական գազի երկարատև գնորդների հարցում։ Դա մասնավորապես վերաբերում է «Շահ Դենիզ 2» գազային հանքավայրին, ուր առկա է ավելի քան 1 տրիլիոն խորանարդ մետր գազ։
Այս տարվա հունիսին Ադրբեջանի նախագահ Ւլհամ Ալիևը հաստատեց, որ ադրբեջանական գազը հասնելու է Եվրոպա, սակայն նա չբացահայտեց, թե կոնկրետ որ երթուղով է այն հասնելու նշանակման վայր։
Ադրբեջանի Հանրապետության պետական նավթային ընկերության (SOCAR) փոխնախագահ Էլշադ Նասիրովն ընդգծեց, որ Ադրբեջանը նախապատվություն տալիս է միջին թողունակություն ունեցող խողովակաշարին, որը հետագայում ի վիճակի կլինի ընդլայնելու իր թողունակությունը։
Ադրբեջանը թերահավատորեն է մոտենում Nabucco-ի խոշորամասշտաբ նախագծին։ SOCAR-ը մտադիր է ստանալ հնարավորինս շատ եվրոպական գնորդներ և դրանով իսկ վաստակել մեծ գումարներ»։
Ամերիկյան պարբերականը գրում է, որ տարածաշրջանի մյուս, գազով հարուստ երկիրը Թուրքմենստանն է, սակայն Ռուսաստանի ու Իրանի դիրքորոշման պատճառով Եվրոպայի առջև ստանձնած այդ երկրի պարտավորություններն անհամոզիչ են թվում, ինչի համար էլ Ադրբեջանի դիրքորոշումը վճռորոշ է լինելու Nabucco-ի ճակատագրի համար։
Հիշեցնենք, որ ավելի վաղ նշվում էր, թե Ադրբեջանը Nabucco-ին միանալու հարցում իր դիրքորոշումը հայտնելու է հոկտեմբերի վերջին։