Երևանի «Փեթակ» առևտրի կենտրանի աշխատակիցներն այսօր առավոտից գործադուլ են իրականացնում։ Նրանք չեն բացել առևտրի տաղավարները և պահանջում են, որպեսզի առևտրի կենտրոնի տնօրինությունը նվազեցնի կամ զեղչեր իրականացնի տաղավարների վարձավճարների մասով։ Առևտրականների խոսքով կորոնավիրուսով և վերջին մեկ ամիսն էլ պատերազմական իրավիճակով պայմանավորված բացարձակ առևտուր չի իրականացվում և իրենք այդքան գումար չունեն, որ տեղի վարձավճարները վճարեն.«Եթե անգամ 1000 դրամի առևտուր չենք անում, ոնց տեղի փող տանք։ Այլևս անհնար է այսպես աշխատելը։ Պետք է տնօրինությունը ըմբռնումով մոտենա այս իրավիճակին։ Երբ լավ առևտուր է լինում, առանց մեզ ասելու միանգամից բարձրացնում են գները, իսկ երբ առևտուր չկա, ոչ էլ ուզում են մեզ ընդառաջ գնան։ Պատկերացրեք ինչ վիճակ է, որ մենք այս պատերազմական վիճակում դուրս ենք եկել ակցիա ենք անում»,-դժգոհեցին առևտրականները։
Նրանց խոսքով, եթե տնօրինությունը որեւէ խելամիտ լուծում չտա իրենց պահանջին, ապա իրենք դիմելու են այլ քայլերի, մասնավորապես փողոցներ են փակելու և շարունակելու են բողոքի գործողությունները։
Մենք փորձեցինք պարզաբանումներ ստանալ նաև տնօրինությունից, սակայն շուկայի աշխատակիցներից մեկը մեզ փոխանցեց, որ մեր հարցերին պատասխանելու իրավասություն ունեցող ոչ ոք շուկայի տարածքում չկա։
Առավել մանրամասն՝ տեսանյութում