Թուրքական Medya73 կայքի փոխանցմամբ՝ ադրբեջանական մեծաթիվ բնակչություն ունեցող Իգդիրում գործունեություն ծավալած, այսպես կոչված «Հայկական անհիմն պնդումների դեմ պայքարի միությունը» (ASİM-DER) Ալիջանի սահմանակետում բողոքի ակցիա է կազմակերպել՝ ընդդեմ Հայաստանի նախագահ Սերժ Սարգսյանի ծաղկաձորյան հայտնի հայտարարության։ Բողոքի ակցիային միացել են մի շարք հասարակական կազմակերպությունների ներկայացուցիչներ։
Նրանք «զինված են» եղել «Մարդասպան Սարգսյան» պաստառներով և այրել են Սերժ Սարգսյանի նկարները։ ASİM-DER-ի ղեկավար Գյոքսալ Գյուլբեյը ասել է. «Իր վերջին հայտարարությամբ Սարգսյանը վերստին «ցուցադրեց» իր թշնամությունը թուրքերի նկատմամբ։ Մենք դիմում ենք Սարգսյանին. եթե կարող ես, արի՛ ու վերցրո՛ւ Արարատ լեռը (թուրքերեն՝ Աղրը դաղ)։ Սարգսյանը «պետք է ներողություն խնդրի» թուրք ժողովրդի դեմ արած հայտարարության համար»։
Գյուլբեյը նաև նշել է, որ ASİM-DER-ը Սարգսյանի դեմ հայցով դիմել է Մարդու իրավունքների եվրոպական դատարան (ՄԻԵԴ)՝ Ղարաբաղում ադրբեջանցիներին «ցեղասպանության ենթարկելու» մեղադրանքով։
