Բժշկական գիտությունների թեկնածու, բժիշկ Վահան Վարդապետյանը կոչով դիմել է մեկ միլիոն դրամ և ավելի աշխատավարձ ստացող մտերիմներին, հարազատներին՝ աշխատավարձի 5%-ը «Հայաստան» համահայկական հիմնադրամին փոխանցելու համար:
««Հայաստան» համահայկական հիմնադրամին փոխանցում եմ աշխատավարձս, պարտավորվում եմ այսուհետ աշխատավարձիս 5%-ը փոխանցել նույն հաշվեհամարին:
Դիմում եմ մեկ միլիոն դրամ և ավելի աշխատավարձ ստացող մտերիմներիս, հարազատներիս՝ աշխատավարձի 1-5%-ի չափով ամսական փոխանցում կատարել նշված հաշվեհամարին:
Կոչ եմ անում շուրջ 5500 ընտանիքների՝ առնվազն երեք հոգու՝ ծնողների ու զավակի անունից մասնակցել համազգային դրամահավաքին: Թեև համոզված եմ, որ արդեն իսկ կատարած կլինեք ձեր «հոգու պարտքը», այնուամենայնիվ, ձեր ընտանիքների կազմավորման ու կայացման հարցում ոչ երկրորդական դերակատար բժշկիս խնդրանքով ևս մեկ անգամ ձեր և ձեր զավակների անունից համազգային դրամահավաքին փոխանցել թեկուզ և խորհրդանշական գումար:
Ավելի քան 100 մլն դոլար գումարի հավաքագրումը 15 օրում բացառիկ երևույթ է «Հայաստան» համահայկական հիմնադրամի գոյության ընթացքում, սակայն այս ճակատագրական իրավիճակում, հայոց գոյամարտի օրերին սա մի չնչին գումար է 10 միլիոն հայության կողմից: Ուստի ռազմաստրատեգիական, կենսական հարցերի լուծման նպատակով անհրաժեշտ ու հրատապ եմ համարում մշակել կոնկրետ մեխանիզմներ ավելի կարճ ժամկետում նվազագույնը 1 մլրդ դոլար հավաքագրելու ուղղությամբ:
Եթե ողջ հայությունը 15 օրում հավաքագրում է 100 մլն դոլար, ապա քանիսը մեն-մենակ (գիտենք անուն առ անուն) կարող են փոխանցել բազմապատիկ գերազանցող գումարներ: Եթե չեն օգտվում ինքնամաքրման այս բացառիկ հնարավորությունից, ուրեմն պետք է գործի պետական հարկադրանքը ռազմական դրության օրենքներով:
Պատերազմի առաջին իսկ օրվանից գործում եմ որպես ժողովրդական դիվանագիտության ակտիվ միավոր, կապ հաստատելով արտերկրի ծանոթներիս, մտերիմներիս, այլազգի քաղաքացիների, մշակութային գործիչների հետ՝ հարուստ տեղեկատվական նյութեր հաղորդելով և անհատապես բացատրելով, որ սա սոսկ կյանքի, հայրենիքի պահպանման ազատագրական պատերազմ չէ, սա լայնածավալ, ահռելի պատերազմ է քաղաքակրթության ու ահաբեկչության, մշակույթի ու բարբարոսության միջև, որ հանուն քաղաքակրթության փոքրաթիվ մի ժողովուրդ կենաց մահու կանգնած՝ աշխարհի կռիվն է տալիս:
Փոքր, չճանաչված մի երկիր դեմ հանդիման Թուրքիային, Ադրբեջանին և վարձու ահաբեկիչներին դիմակայում է ու չի պարտվում, ուրեմն հաղթելու է: Մենք հաղթելու ենք նաև մեր ժողովրդավարությամբ և լեգիտիմությամբ:
Բարձր եմ գնահատում գրագետ, նպատակաուղղված քարոզչական աշխատանքը. ճիշտ ժամանակին աշխարհին ընկալելի դարձավ՝ ով է նախահարձակ պետությունը, այսօր աշխարհին հայտնի է, որ սա Թուրքիայի անմիջական մասնակցությամբ և վերահսկողությամբ սանձազերծված պատերազմ է, աշխարհին ապացուցված է ահաբեկիչների մասնակցությունը, և այն դարձել է ամենաքննարկվող ու տագնապահարույց հարցերից մեկը, քաղաքակիրթ աշխարհը ուղղակի խոցված է Շուշիի Սբ. Ղազանչեցոց եկեղեցու ավիրումից, բուժօգնության շտապող մեքենայի ռմբակոծությունից:
Գոհ եմ ՀՀ և ԱՀ ղեկավարների նվիրված ու համագործակցված աշխատանքից, այս օրերին անվերապահորեն աջակցում եմ ու պահանջում ռազմական դրության օրենքներով կարգի հրավիրել և խստագույնս պատժել պառակտիչներին, խառնակիչներին և սադրիչներին:
Հպարտ եմ մեր փառապանծ բանակի, հայ զինվորի սխրանքով ու անձնազոհությամբ, հիացած եմ մեր ժողովրդի միասնությամբ և համախմբվածությամբ, խոնարհվում եմ անդառնալի կորուստների հավերժ լուսավոր հիշատակի առջև…
Խոստանում եմ էլ ավելի արդյունավետ աշխատանքով նպաստել մեր ժողովրդի վերարտադրությանը:
Արցախի անկախության ճանաչումն անխուսափելի է, և գործընթացն արդեն սկսված է:
Հ.Գ. Միասնաբար պահպանենք հակահամաճարակային կանոնները՝ առողջապահական համակարգին ազատելով լրացուցիչ ծանրաբեռնվածությունից»:
