Թուրքական իշխանությունները չորեքշաբթի գիշերը Հունաստանի կառավարական ինքնաթիռը 20 րոպե պահել են Մոսուլից հյուսիս ընկած թուրք-իրաքյան սահմանի վրա՝ հրաժարվելով տրամադրել ավելի վաղ հաստատված թռիչքի թույլտվությունը: Ինքնաթիռում է գտնվել արտաքին գործերի նախարար Նիկոս Դենդիասը, որը Աթենք էր վերադառնում, հաղորդում է Հունաստանի ERT հանրային հեռուստատեսությունը:
«Այս գործողությունը դուրս է գալիս բարիդրացիության շրջաանակներից և խախտում է դիվանագիտական վարքի կանոնները», – նշում է հեռուստաալիքը:
Հունաստանի արտգործնախարարի Իրաք կատարած այցը 22 տարվա մեջ առաջինն էր: Այցն ավարտելուց հետո ինքնաթիռը օդ է բարձրացել Իրաքից:
«Թուրքական իշխանությունները տեղեկացված են եղել VIP չվերթի մասին և թռիչքի թույլտվություն են տվել, բայց սահմանին մոտենալու ժամանակ հետ են կանչել այն: Ինտենսիվ դիվանագիտական բանակցություններ են սկսվել, ինքնաթիռը ստիպված է եղել իջեցնել բարձրությունը և պտույտներ գործել, մինչև խնդրի լուծումը: Ընդ որում, վառելիքի պակասության ռիսկի հարց է առաջացել», – հաղորդում է ERT- ն:
Կեսգիշերին մոտ ինքնաթիռը վայրէջք է կատարել Աթենքի մերձակա Էլեուսիս օդանավակայանում:
