Վարչապետ Նիկոլ Փաշինյանի ուղերձը պատասխան չէր Ռուսաստանի ԱԳ նախարար Լավրովի հայտարարությանը, այն վաղուց էր ծրագրված և մեկը մյուսին չէին էլ հակասում։ Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Միքայել Զոլյանը՝ անդրադառնալով նրան, որ ՌԴ ԱԳ նախարարը այսօր հայտարարել է, որ հրադադարի ռեժիմը պահպանելու համար հակամարտության գոտում պետք է խաղաղապահներ տեղակայվեն, որից հետո եղավ ՀՀ վարչապետի ուղերձը, որտեղ նշվում էր, որ համաձայն չէ «տարածքներ խաղաղության դիմաց» սկզբունքին և պետք է պայքարել մինչև հաղթանակ։
«Մեծ հաշվով, Լավրովը պատմում էր, թե ինչ գործընթաց է եղել ընթացքում, ինչ փաստաթղթեր են եղել սեղանին մինչև 2018 թվականը։ Վարչապետը ևս դրան անդրադարձավ և բացատրեց, թե ինչու այդ գործընթացը ոչ մի տեղ չի տարել, որովհետև Ադրբեջանը, ըստ էության, առավելապաշտական պահանջներ է դրել և հրաժարվել է փոխզիջումից»,-ասաց նա։