Արցախյան պատերազմի առաջին իսկ օրերից խոսվում է ահաբեկիչների ներգրավման մասին: Այսօր ահաբեկիչներ են հայտնվել նաև Չեչնիայում և հակաահաբեկչական հատուկ գործողության ընթացքում չեզոքացվել են: Ի՞նչ միջազգային նորմեր կան՝ կապված ահաբեկիչներին չեզոքացնելու հետ:
Թեմայի շուրջ «Առաջին լրատվական»-ի հետ քննարկմանը մասնակցեցին փաստաբաններ Գևորգ Դավթյանը, Վահագն Մարտիրոսյանը և Նարեկ Ներսիսյանը:
Գևորգ Դավթյանի խոսքով՝ միջազգային բավականին շատ ակտեր կան, որոշ երկրներ նաև ներպետական ակտերն ունեն, որոնցով բավականին խիստ պատժամիջոցներ են նախատեսվում և բավականին լուրջ միջոցառումներ են իրականացվում ահաբեկիչներին բացահայտելու և օրենքի առաջ կանգնեցնելու համար:
«Երբ որ սեպտեմբերի 27-ին սկսվեց այս արհավիրքը՝ Ադրբեջանի և Թուրքիայի անմիջական նախաձեռնությամբ, ի սկզբանե ասում էինք,որ գործ ունենք ոչ միայն Ադրբեջանի և Թուրքիայի հետ, այլ նաև ահաբեկիչների հետ: Դա բացահայտ էր, և միջազգային հանրությունն ուղղակի չէր կարող լռել: Հարց է առաջանում, թե միջազգային պայմանագրերով առկա պատասխանատվություններն ինչպես են դրսևորվելու ահաբեկիչների դեմ պայքարելու գործում:
Մենք անընդհատ բարձրաձայնում ենք, որ այստեղ խախտվում են պատերազմի կանոնները, հստակ կանոնակարգեր կան, որոնք չպետք է խախտել, իսկ ահաբեկիչները դուրս են այդ ոլորտից: Մենք բարձրաձայնում ենք ահաբեկիչների մասին և միջազգային հանրությունից ակնկալում ենք գործուն քայլեր, պատասխանատվության պետք է ենթարկել ահաբեկիչներին ներգրավող երկրներին»,- նշեց Գևորգ Դավթյանը:
Վահագն Մարտիրոսյանի դիտարկմամբ՝ Հայաստանն էլ, որպես պետություն, անելիք ունի, օրենսդրական փոփոխություններ, այդ թվում նաև Քրեական օրենսգրքում լրացումներ պետք է արվեն պատժամիջոցները պետք է խստացվեն: «Մի շարք պետություններ ունեն իրավական գործառույթ՝ որոշակի կազմակերպությունների ճանաչում են որպես տեռորիստ, և դրանք իրավական հետևանքներ են նախատեսում, ՀՀ-ն ևս նման իրավական ռեժիմ պետք է սահմանի, թե ՀՀ-ի տեսակետից՝ որ կազմակերպություններն են համարվում տեռորիստական: Եվ պետք է սահմանել, թե ինչ պատիժներ պետք է ստանան ահաբեկիչները, եթե հայտնվեն Հայաստանի իրավական տիրույթում, բացի դրանից՝ պետք է գործակցել մի շարք պետությունների՝ մասնավորապես ՌԴ-ի հետ»,- ասաց Մարտիրոսյանը:
Նարեկ Ներսիսյանի դիտարկմամբ՝ մինչև սեպտեմբերի 27-ը Թուրքիայի կողմից թաքնված ագրեսիա կար, որն այժմ բացահայտ է:
Քննարկման մասնակիցները կարծիք հայտնեցին, որ պետք է ահաբեկիչներին գերի վերցնել, որպեսզի գրավենք միջազգային հանրության ուշադրությունը:
Մանրամասն՝ տեսանյութում:
