Աշխարհահռչակ երաժիշտ Եվգենի Կիսինը պատասխանել է օպերային երգիչ Յուսիֆ Էյվազովին, որը գովաբանել է Իլհամ Ալիևին և մաղթել «ադրբեջանական հողերի վերադարձ»:
Կիսինն իր հերթին գրել է.
«Տեղեկատվության համար. համաձայն Economist Intelligence Unit Democracy Index-ի՝ 2019 թ., #Ադրբեջանում ավտորիտար ռեժիմ է, և ժողովրդավարության մակարդակով այն 146-րդ տեղում է՝ 167 երկրներից (Զիմբաբվեից, Ռուսաստանից, Վենեսուելայից, Կուբայից ցածր), իսկ ըստ «Լրագրողներ առանց սահմանների» կազմակերպության տվյալների՝ 2020 թ. մամուլի ազատության մակարդակով Ադրբեջանը 180 երկրներից 168-րդն է աշխարհում (Ռուսաստանից, Բելառուսից և այլ երկրներից էլ ցածր):
Եվ նման պետությունը պարոն Էյվազովը անվանում է «մեծ երկիր», նրա հպատակներին՝ «մեծ քաղաքացիներ» և հպարտանում է իր բռնապետով:
Ես, իհարկե, չեմ ուզում, իջնել անձնական վիրավորանքների մակարդակին, հատկապես գործընկերոջ հասցեին, բայց այստեղ ես պարզապես չեմ կարող չհիշել (որպես ոչ թե վիրավորանք, այլ պարզապես հիշեցում) հայտնի խոսքերը, որոնք Բաքվի մեծ բնակիչ Լև Լանդաուն, գտնվելով Ստալինի բանտում, սիրում էր ասել իր բանտակիցներին, ովքեր գովերգում էին «առաջնորդին և ուսուցչին».
«Ոչ ոք մեղավոր չէ, եթե նա ստրուկ է ծնվել. բայց ստրուկը, որը ոչ միայն խուսափում է իր ազատության ձգտումից, այլև արդարացնում և զարդարում է իր ստրկությունը, այդպիսի ստրուկը առաջացնում է վրդովմունքի, արհամարհանքի և նողկանքի օրինական զգացողություն…»:
Հիշեցնենք, որ Կիսինը նախկինում աջակցություն էր հայտնել հայ ժողովրդին՝ Instagram-ի իր էջում գրելով. «Ես քեզ հետ եմ, Հայաստան»: Նա նաև տարածեց Կոմիտասի «Կռունկ» ստեղծագործության իր կատարման տեսագրությունը:
