Այս օրերին մենք իրականացնում ենք ճգնաժամային աջակցություն: Կազմակերպված տարհանում չի եղել, բայց ինքնակամ Հայաստան տեղափոխված անձանց ցուցաբերվում է աջակցություն: Այս մասին «Առաջին լրատվական»-ի հետ զրուցում ասաց Աշխատանքի և սոցիալական հարցերի նախարար Զարուհի Բաթոյանը՝ հավելելով, որ կամավորների մեծ խմբերը հսկայական և ճկուն աշխատանք են իրականացնում: «Ոչ մի մարդ փողոցում չի մնացել ոչ միայն նրա շնորհիվ, որ պետական որևէ կառույց լավ է աշխատել, այլ որովհետև ՀՀ քաղաքացիները չէին թողնի, որ որևէ մեկը փողոցում մնար»:
«Աշխատանքի և սոցիալական հարցերի նախարարության կողմից ստեղծվել է սոցիալական շտաբ, որը աշխատում է կամավորների աջակցությամբ, հավաքագրվում է աջակցությունը՝ տարբեր տեսակի, և գործում է 117 թեժ գիծը, որի միջոցով կարող են և՛ օգնություն խնդրել, և՛ օգնություն առաջարկել: Սննդի և հագուստի ապահովման գործընթացն իրականացվում է ՏԻՄ-երի կողմից: Քաղաքացիներին կոչ ենք անում աշխատել ՏԻՄ-երի հետ: Հիմնականում օգտագործում ենք մասնավոր սեկտորի կողմից տրամադրվող կացարաններ»,- ասաց նախարարը:
Նրա խոսքով՝ Ազգային ժողովում այսօր քննարկվում էր նախագիծ, որով նախատեսվում է պահպանել ռազմաճակատ մեկնած կամավորների աշխատատեղը, աշխատանքային ստաժը և վարձատրությունը: «Մասնավոր սեկտորի դեպքում ընտրությունը թողնելու ենք գործատուին: Նախագիծը մշակվել է հրատապ ռեժիմում, մինչև երկրորդ ընթերցմամբ ընդունվելը կբարելավվի»,- նշեց Բաթոյանը:
Մանրամասն՝ տեսանյութում:
