ՀՀ ԱԳՆ հայտարարությունը Շուշիի կրոնական պաշտամունքի վայրերի և մշակութային հուշարձանների թիրախավորման վերաբերյալ
Հոկտեմբերի 8-ին Ադրբեջանի զինված ուժերը օդային հարվածներ են հասցրել հայկական ճարտարապետության գոհար՝ Արցախի մշակութային մայրաքաղաք Շուշիի կենտրոնում գտնվող Սուրբ Ամենափրկիչ Ղազանչեցոց Մայր տաճարին՝ պատճառելով նրան զգալի ավերածություններ։
Սա Ադրբեջանի ռազմաքաղաքական ղեկավարության հերթական հանցագործությունն է, որը բացահայտում է նրա հակամարդկային Էությունը։ Այնուհանդերձ, այս քայլը լիովին տեղավորվում է տասնամյակներ ի վեր իրականացվող հայատյացության քաղաքականության մեջ։ Ադրբեջանը, որն ամբողջովին բնաջնջել է հայկական մշակութային ժառանգությունը Նախիջևանում և հայ ժողովրդի պատմական հայրենիքի այլ մասերում, այժմ փորձում է Արցախի դեմ սանձազերծած ռազմական ագրեսիայի շրջանակներում հայրենիքից և պատմական հիշողությունից զրկել արցախահայությանը։
Իր այս գործողություններում Ադրբեջանն ուղղակիորեն ընդօրինակում է իր նորօրյա դաշնակիցների՝ միջազգային հայտնի ահաբեկչական կազմակերպությունների գործելաոճը, որի արդյունքում Մերձավոր Արևելքում ոչնչացվել են բազմաթիվ պատմամշակութային կոթողներ։
Խստորեն դատապարտում ենք Ադրբեջանի այս հրեշավոր հանցանքը, որը միաժամանակ նաև մարտահրավեր է ողջ քաղաքակիրթ մարդկությանը։
Այս առիթով հիշեցնում ենք Ադրբեջանի ռազմաքաղաքական ղեկավարությանը, որ կրոնական պաշտամունքի վայրերի և մշակութային հուշարձանների թիրախավորումն ամրագրված է միջազգային հումանիտար իրավունքում՝ որպես պատերազմի հանցագործություն, որի համար պատասխանատվությունը չունի վաղեմության ժամկետ։
https://www.facebook.com/ArtsakhInformation/posts/192589432381845?__xts__%5B0%5D=68.ARDoeWuzjDc8T79pTnT8Sa-HqXJ6P4LTDvjdVOcpwiw4mfR-H45HHnlQMoFThuT5bbwU9ZChsxIfBrZfE4w7LWl_PnBTfwejAd4oVQ2tJtJBG5SEAQGTDdUlz9Ixo-Nb60v8gTDw3uFwQUNiAx1BLpEXKsoCDxRKI3UjcMOrQkwKPplX8niWfljiI7NpHpec79PRxEw91-oT9SoZhnbMXDd21Q1BzFmOteHTrK85WRVcogE9cv3lmkVridlC9Ege_56QmKX8VPk9COeHZQffHwHoHiO0vkiT6qwgg5ETh-UHUn7IR9gZtHHTNS-WkWJEU5SrEwEpy6VR8tFPEGtDsAT8IOc2sIlK7ykvIw63rhFV74HJoQ&__tn__=K-R
