Իտալիայի վարչապետ Սիլվիո Բեռլուսկոնին վախենում է, որ Լիբիայի առաջնորդ Մուամար Քադաֆին իրեն սպանելու հրաման է տվել: Այս մասին նա ասել է իտալական Corriere della Sera թերթին: Վտանգը հիմնականում պայմանավորված է այն հանգամանքով, որ Իտալիայի վարչապետը թույլատրել է, որպեսզի Իտալիայի ռազմաբազաներն օգտագործվեն Լիբիան ռմբակոծելու համար:
«Իմ կյանքը վտանգված է և, ցավոք սրտի, ոչ միայն իմ, այլև իմ ընտանիքի անդամների: Ես վստահելի աղբյուրներից գիտեմ, որ Քադաֆին հրամայել է սպանել ինձ»,- ասել է Բեռլուսկոնին: Միևնույն ժամանակ Բեռլուսկոնին չի մանրամասնել, թե հատկապես որ աղբյուրներից է ստացել նման տեղեկություն:
Նա հիշեցրել է, որ Տրիպոլիում ցույցերի ժամանակ պարզում են նկարներ, որտեղ ինքը սեղմում է Քադաֆիի ձեռքը. «Նա ընկալել է մեր ներխուժումը որպես դավաճանություն»,- ասել է կառավարության ղեկավարը: Բեռլուսկոնիի խոսքերով, այժմ վտանգ կա, որ ժամանակին իր ամենալավ բարեկամը, իսկ այժմ՝ ոխերիմ թշնամին հնարավորություն ունի մնալու իշխանության:
