«Առաջին լրատվական»-ի զրուցակիցն է ՀՀ արտակարգ և լիազոր դեսպան, Արցախի ԱԳ նախկին նախարար Արման Մելիքյանը։
–Արցախի ԱԳՆ-ն միջազգային հանրությանը կոչ է անում ճանաչել Արցախի անկախությունը։ Սա արդյոք կարող է լինել խաղաղության վերականգման ճանապարհ։ Եվ արդյոք միջազգային հանրությունը պատրաստ է ճանաչել Արցախի անկախությունը։
-Ստեղծված իրավիճակում խաղաղության վերականգնման ճանապարհը հակառակորդին ռազմական պարտության մատնելն է:
–Կարծիքներ կան, որ Հայաստանի կողմից Արցախի անկախության ճանաչումը կարող է էլ ավելի սրել ներկայիս պատերազմական վիճակը։ Դուք այդ գործընթացում ռիսկեր տեսնո՞ւմ եք։
-Այդ հարցի պատասխանը նախ պետք է տրվի ռազմաճակատում: Մենք պետք է մտածենք հենց այնտեղ ստացված փաստացի արդյունքին իրավաքաղաքական ձևակերպում տալու մասին:
–Միջազգային հանրությունը, հատկապեց Ֆրանսիան մեծ ջանքեր են գործադրում հակամարտության կողմերին վերադարձնել բանակցությունների սեղանի շուրջ։ Ադրբեջանը կարծես թե հակված չէ այս տարբերակին։ Ինչ եք ակնկալում ստեղծված իրավիճակում։
-Ջանքեր են գործադրվում, այդ թվում նաև Ֆրանսիայի կողմից, իրավիճակը կրկին հին հունի մեջ խցկելու ուղղությամբ: Հավանաբար նման ջանքերի հեղինակները չեն ուզում հավատալ, որ դա այլևս անհնար է: Իլհամ Ալիևին այս ռազմական արկածախնդրությանը մղողները դա ի սկզբանե են հասկացել ու լավ կլինի, որ թե մենք, թե մեր բարեկամները համակերպվենք դրա հետ ու վերջապես սկսենք գործել նոր իրավիճակի տրամաբանությանը համահունչ ձևով: