ՌԱՀՀԿ փորձագետ Էդգար Վարդանյանը, մեկնաբանելով ԱՄՆ Կոնգրեսի ֆինանսական հատկացումների կոմիտեի պետական և արտասահմանյան գործառնությունների ենթահանձնաժողովում քննարկված՝ 2012թ. Լեռնային Ղարաբաղի համար ֆինանսական օգնության չնախատեսման որոշման փաստը, «Առաջին լրատվականի» հետ զրույցում ասաց, որ նման որոշման համար կարող են լինել մի քանի պատճառներ:
Նրա խոսքով, ԱՄՆ-ը կրճատում է իր արտաքին հատկացումների ծավալները և ԼՂՀ-ին ֆինանսապես չօժանդակելու փաստը կարող է տեղավորվել այդ տրամաբանության մեջ, բացի այդ, վերջերս Եվրամիության՝ ղարաբաղյան հակամարտության կարգավորման գործընթացում ավելի խորը մասնակցություն ունենալու ու ֆինանսական հատկացումներ կատարելու ցանկությունը ևս կարող է դեր խաղալ: «Խաղի մեջ ակտիվորեն մտնում է Եվրամիությունը, և Միացյալ Նահանգները սրանով մի սիմվոլիկ ժեստ է անում, որ ինքը աջակցում է Եվրամիության ակտիվացմանը վերոնշյալ գործընթացում և մի փոքր հետ է քաշվում»,- ասաց փորձագետը՝ նշելով, որ չի բացառվում, որ Freedom House կազմակերպության վերջին զեկույցում ԼՂՀ-ին տրված ցածր գնահատականը ևս կարող էր ազդել այս որոշման վրա:
«Վերջին հաշվով, սա որպես նախազգուշացում կարող է դիտվել Միացյալ Նահանգների կողմից, որ շահագրգռված չէ օգնություն ցուցաբերել մի երկրի, որտեղ մարդու իրավունքներում հետընթաց է արձանագրվում»,- ասաց նա:
Հարցին՝ արդյո՞ք սա ԼՂՀ գործընթացում Հայաստանի վրա ճնշման ձև չէ, Է.Վարդանյանն ասաց, որ գաղտնիք չէ, որ մինչև տարեվերջ բանակցային կողմերից ակնկալում են գոնե շրջանակային համաձայնագրի կնքում ու դրան հասնելու համար կիրառում են տարբեր միջոցներ, այդ թվում՝ անուղղակի ճնշումներ, և սա կարելի է դիտարկել որպես այդպիսի ճնշման ձևերից մեկը:
«Այնուամենայնիվ, սա դեռ վերջնական որոշում չէ, քանի որ հարցը քննարկել է միայն ենթահանձնաժողովը»,- ավելացրեց Վարդանյանը՝ նշելով, որ պետք է սպասել օգնություն տրամադրելու փաստաթղթի վերջնական ընդունմանը, ու չի բացառվում, որ դրանում որոշակի փոփոխություններ լինեն:
