Այսօր՝ սեպտեմբերի 28-ին, Ազգային ժողովում հրավիրվել է արտահերթ նիստ: Օրակարգում 2020թ. սեպտեմբերի 27-ին Արցախի Հանրապետության դեմ Ադրբեջանի սանձազերծած ռազմական ագրեսիան դատապարտելու վերաբերյալ ԱԺ հայտարարության նախագիծն է:
Ինչպես հայտարարեց անկախ պատգամավոր Արման Բաբաջանյանը` աշխարհում քաղաքականությամբ զբաղվողների աչքերն ու ականջները մնում են փակ, անկախ նրանից` ինչ են տեսնում ու ինչ են լսում. «Ակնհայտ է մեկ բան` այս պատերազմը քաղաքակրթական և արժեբանական պատերազմ է, որը մենք մղում ենք նաև նրանց փոխարեն, ովքեր հարկի ու անհարկի հանդես են գալիս այդ արժեքների պաշտպանության դիրքերից»:
Նրա խոսքով` իրերն իրենց անունների կոչով դիմելու դեպքում պետք է ասել. «Ինչպես մեր ռազմավարական դաշնակիցները, այնպես էլ մեզ մարդու իրավունքների ու ազատությունների մասին ճառեր կարդացողները թքած ունեն ինչպես մեր ռազմավարական շահերի, այնպես էլ մարդու ամենաաստվածային իրավունքի` կյանքի իրավունքի բռնաբարման իրողությունների վրա»:
Բաբաջանյանն ընդգծեց. «Մինչ աշխարհի տարբեր մայրաքաղաքներում գրվում են դատապարտող դատարկ հայտարարություններ, այդ նույն պահին զոհվում են մեր զինվորներն ու խաղաղ բնակիչները»:
Նա շեշտեց. «Մենք հաղթելու ենք մեզ պարտադրված պատերազմում, բայց ճշմարտությունը ևս հաղթելու է, հաղթելու է երեսպաշտությանն ու երկակի ստանդարտներին»:
Մանրամասն՝ տեսանյութում:
