Հայ-թուրքական սահմանի Նախիջևանի հատվածում իրավիճակը հանգիստ է: Հակառակորդի կողմից որևէ շարժ չի նկատվում, կրակոցներ չկա: Այս մասին «Առաջին լրատվական»-ի հետ զրույցում ասաց Արարատի մարզի սահմանամերձ Զանգակատուն համայնքի ղեկավար Հովիկ Կարապետյանը:
«Ուժերի տեղաբաշխում չի նկատվում, երեկվա ու էսօրվա մեջ տարբերություն, հակառակորդի շարժ չի նկատվում: Կրակոցներ չկան: Եթե մեկ շաբաթ առաջ մերթընդմերթ լինում էին կրակոցներ, այսօր չկան»,- ասաց համայնքի ղեկավարը: Կարապետյանի խոսքերով՝ անհրաժեշտության դեպքում բոլորն էլ կմեկնեն Արցախ՝ պաշտպանելու մեր երկիրը:
Հայ-ադրբեջանական սահմանի Տավուշի հատվածում ևս այս պահին հարաբերական անդորր է: Սահմանապահ Չինարի համայնքի ղեկավար Սամվել Սաղոյանը «Առաջին լրատվական»-ին փոխանցեց, որ իրավիճակը հանգիստ է, այս պահին կրակոցներ չկան:
Փորձեցինք հասկանալ, թե ինչ վիճակ է Վարդենիսի տարածաշրջանում, սակայն այս պահին ապարդյուն, քանի որ Վարդենիսի համայնքապետն առհասարակ անհասանելի էր, իսկ Ճամբարակի համայնքապետ Վազգեն Ադամյանը հրաժարվեց որևէ տեղեկություն հայտնել՝ պատճառաբանելով, որ ժամանակ չունի և անջատեց լսափողը: