«Սեպտեմբերի 20-21-ից պարզ էր, որ Ադրբեջանն ինչ-որ բան է նախապատրաստում։ Չեմ կարծում, թե հայկական կողմի համար ինչ-որ գաղտնիք կար։ ՌԴ իշխանությունները ադրբեջանական տարբեր կազմակերպություններին զգուշացնում էին, որ հանդարտություն պահպանվի։ Սադրանքներից խուսափելու համար այդ տեղեկատվությունը չէինք բարձրաձայնում»,- «Առաջին լրատվական»-ի հետ զրույցում ասաց Մոսկվայի «Միաբանություն» կենտրոնի ղեկավար Սմբատ Կարախանյանը։
Կարախանյանը հավելեց. «Թուրքական ռազմական հետախուզության հարձակողական գործողությունների մասնագետները Բաքու են ժամանել սեպտեմբերի 15-ին, բերել են փաստաթղթերի փաթեթներ, սխեմաներ, ուղղություններ և այլն: Սեպտեմբերի 20-21-ը արդեն ճակատային գրոհ սկսելու վերջնական որոշումն էր: Գործողությունների ռեզերվում են՝ սադրանքներ Նախիջևանի սահմանին և Վարդենիսում (Հայաստան)»։
Մեր զրուցակցի խոսքերով՝ ինչպես միշտ, հակառակորդը նենգ ու կեղտոտ կոնֆլիկտներ է հրահրում, չի բացառվում նույնն անեն նաև Ռուսաստանի տարածքում. «Իրենք այստեղ փորձում են մուսուլմանական գործոնն օգտագործել, բայց այդ մարդիկ կա՛մ չեզոք են մնում, կա՛մ գալիս հայերի հետ են խոսում։ Այսօր առավոտվանից Ադրբեջանի դեսպանության խորհրդականները ադրբեջանական երիտասարդության ընդունումներ են անում։ Մի կողմից նրանց նախապատրաստում են, խորհուրդներ են տալիս՝ ինչ անեն, ոնց անեն։ Շեշտը դնում են ադրբեջանական ուսանողության, շուկաներում աշխատող սոցիալապես ավելի ցածր մակարդակ ունեցող մարդկանց վրա։ Հիմա սադրանքների պլաններ են մշակում, սպասում են ռազմական դաշտի առաջին արդյունքներին»։
Կարախանյանի դիտարկմամբ՝ այժմ Ռուսաստանում էլ շատ լավ հասկանում են, որ Ադրբեջանի հետ խոսելն անիմաստ է։ Սրա հետևում կանգնած է Թուրքիան, ու այդ պատճառով էլ Լավրովը հեռախոսազրույց ունեցավ Թուրքիայի ԱԳ նախարարի հետ. «Գիտենք, որ այս ամենը ուղղորդվում է Էրդողանի, նրա ռազմատենչ խորհրդականների կողմից։ Ո՛չ հայկական իշխանությունները, ո՛չ էլ հայկական ծառայությունները անակնկալի չեն եկել, այս ամենը շատ լավ հասկանում էինք։ Մենք հիմա սպասում ենք այստեղ որոշակի գործողությունների, բայց դրանք, ինչպես միշտ, կլինեն հայկական ռազմուժի որոշակի հաջողություններից հետո։ Առայժմ զբաղված են քարոզչական խոսակցություններով՝ իբրև հետ են վերցնում ադրբեջանական տարածքներ, բայց լուրջ քայլերի համար իրենք վախկոտ են։ Հենց սկսեն ռազմական դաշտում պարտվել, կսկսեն ինչ-որ քայլեր անել։ Բայց ի փառս հայությանը, հայկական համայնքին, հայ գործիչներին՝ անկախ գաղափարական տարաձայնություններից, ցանցային կերպով, շատ կուռ ձևով պատասխաններ ենք տալու։ Խոսում ենք Մոսկվայի իշխանությունների, մնացած շրջանների իշխանությունների հետ, տեղյակ ենք պահում այս հարցերի մասին, նշում ենք, որ հնարավոր են այսպիսի իրավիճակներ, որ իրենք էլ անակնկալի չգան»։
Մեր զրուցակիցն ընդգծեց՝ Ռուսաստանը կոնֆլիկտի ճակատ չէ, ու հայկական կողմը մշտապես հենց դա է պնդում. «Եթե ինչ-որ հարցեր են առաջանում, պետք է իրավապահ մարմինները աշխատանք տանեն ու այս պահի դրությամբ այդպիսի ըմբռնումներ կան։ Թե ինչ հանձնարարություններ կտան թուրքական իշխանությունները այստեղի երիտասարդներին, որոնք այսօր առավոտվանից դեսպանատանն են հավաքվում՝ պարզ չէ։ Կսպասեն մեր հաղթանակին, որից հետո իրենց հիստերիան կսկսվի հայաշատ ու ադրբեջանաշատ վայրերում, քաղաքներում ու գյուղերում։ Մենք այս ամենի մասին գիտենք, սպասում ենք ու պատրաստ ենք»։
Սմբատ Կարախանյանը նշեց՝ այժմ բոլորը պետք է զգոն լինեն. «Ռուսաստանում փոքր ու մեծ ժողովուրդներ մեզ իրենց աջակցությունն են հայտնում։ Ասում են՝ հստակ է, որ այս ամենը Թուրքիայի կազմակերպած սադրանքներ են։ Կա կարծիք, որ սրանով Ադրբեջանն արագացնում է Արցախի Հանրապետության անկախության ճանաչումը ոչ միայն Հայաստանի, այլ միջազգային հանրության կողմից։ Բոլորս վստահ ենք, որ հայկական բանակը ջարդելու է այդ սադրանքները ու այս ամենը վերջանալու է Արցախի փայլուն հաղթանակով, իսկ հետագայում՝ նաև միջազգային ճանաչմամբ»։