Հարյուրավոր լրագրողներ հսկայական ծավալի գաղտնի փաստաթղթեր են ուսումնասիրել, որոնցից հետևում է, որ խոշոր բանկերն օգնել են կեղտոտ փողերը տեղափոխել աշխարհով մեկ: Խոսքը ԱՄՆ ֆինանսների նախարարության կազմում գործող ֆինանսական հանցագործությունների դեմ պայքարի հատուկ ստորաբաժանման FinCEN ֆայլերի մասին է: Այդ փաստաթղթերը ստացել են Buzzfeed-ի լրագրողները, որոնք այնուհետև դրանք հանձնել են Հետաքննող լրագրողների միջազգային կոնսորցիումին (ICIJ): Այս խումբը միավորում է 88 երկրների 108 լրատվական կազմակերպությունների ներկայացուցիչների, այդ թվում BBC-ի «Պանորամա» ծրագրի լրագրողներին:
Փաստաթղթերը, ի թիվս այլ բաների, ցույց են տալիս, թե ինչպես են ռուս օլիգարխներն օգտագործում արևմտյան բանկերը՝ իրենց դեմ սահմանված ԱՄՆ և ԵՄ պատժամիջոցները շրջանցելու համար: Մասնավորապես, Վլադիմիր Պուտինի մտերիմներից մեկը՝ Արկադի Ռոտենբերգը, ենթադրաբար, կարող էր փողերի լվացման համար օգտագործել Լոնդոնի Barclays բանկը և խուսափել ԱՄՆ-ի իշխանությունների և ԵՄ կողմից նրա նկատմամբ սահմանված պատժամիջոցներից:
Լրատվամիջոցների տրամադրության տակ հայտնված փաստաթղթերից հետևում է նաև, որ Լյուբով Չերնուխինայի ամուսինը, որը իշխող Թորի կուսակցությանը 1.7 միլիոն ֆունտ ստեռլինգ (2.2 միլիոն դոլար) է նվիրաբերել, 2016թ.-ին 8 միլիոն դոլար դրամական փոխանցում է ստացել: Սկզբնապես միջոցները փոխանցվում էին գործարար Քերիմովի կողմից, որը ԱՄՆ պատժամիջոցների տակ է գտնվում Կրեմլի հետ կապերի համար: