Իտալիայում 21-ամյա մի կին դիմել է բժշկի՝ ոտքերի այտուցի գանգատով։ Հայտնվելով վերակենդանացման բաժանմունքում՝ իմացել է, որ ութ ամսական հղի է: Այս մասին պատմել է Twitter-ի օգտատեր @vonde_monadis-ը, որը տեղի հիվանդանոցի բժիշկ-ռենտգենոլոգն է:
Իտալուհին ոտքերի այտուցի գանգատով դիմեց թերապևտին: Նրան ուղարկեցին հետազոտությունների, բայց հիվանդի վիճակը կտրուկ վատացավ: Նա կորցրեց գիտակցությունը, սկսեցին ցնցումային նոպաներ, իսկ մարմնի ջերմաստիճանը իջավ 36,1°C:
Հիվանդին թոքերի օդափոխիչ միացրին և ուղղաթիռով շտապ տեղափոխեցին հիվանդանոց, որտեղ աշխատում է պատմության հեղինակը: Բժիշկները փորձել են պարզել, թե որն է իտալուհու հիվանդության պատճառը՝ իմանալով միայն, որ նա, մոր խոսքերով, հակաբեղմնավորիչ հաբեր է ընդունում: Քննության ընթացքում բժիշկները հասկացել են, որ հիվանդը հղիության վերջին շրջանում է, և էկլամպսիայի նոպա է սկսվել՝ հղիության, ծննդաբերության և հետծննդյան շրջանում տեղի ունեցող մահացու բարդություն:
Ի վերջո, բժիշկները կարողացան հիվանդի վիճակը կայունացնել և ուշքի բերել: Գիտակցության գալուն պես պարզվեց, որ նա չգիտի հղիության մասին: Իտալուհին դեռ բժիշկների հսկողության տակ է, իսկ երեխան նորածնային վերակենդանացման բաժանմունքում է: Հաղորդագրությունների շարքի հեղինակը հույս ունի, որ թե՛ նորածինը, թե՛ նորաթուխ մայիկը առողջացած դուրս կգրվեն հիվանդանոցից: