Նիկոլաս Քեյջն ու Ջոն Կյուսակը նկարահանվում են «Սառցակալած երկիր» ֆիլմում, որում ներկայացվում է սերիական մարդասպանի և ոստիկանի հակամարտությունը: Այս մասին հայտնում է The Playlist-ը:
Ֆիլմի սյուժեի հիմքում իրական դեպքեր են: Սերիական մարդասպան Ռոբերտ Հանսենը 1970-1983 թթ. ժամանակահատվածում կանանց խաբելով իր տուն էր բերում, ծեծում, բռնաբարում և մասնավոր ինքնաթիռով տեղափոխում Ալյասկայի հեռավոր անտառներից մեկը, որտեղ կուրացնում էր զոհին, ապա որսում նրան հրացանով կամ դանակով:
Այդպես հացի փռի տերը (հենց այդ մասնագիտությունն է ունեցել նա) սպանել է 21 կին, սակայն հաստատվել է միայն 17-ի սպանությունը: Հանսենը ոստիկանության ուշադրության կենտրոնում է հայտնվել 1983-ին, երբ Անքորիջի բաժիններից մեկն է բերվել մի մարմնավաճառ կին, որը, իր ասելով, փախած է եղել մի մարդուց, որը ցանկացել է սեփական ինքնաթիռով իրեն տանել անտառ: Այդ տղամարդը Հանսենն է եղել, որն ամբողջովին հերքել է ամեն ինչ: Այդ պահից քննիչ Գլեն Ֆլոտը, որը հետագայում գլխավորել է Հանսենի ձերբակալությունը, զբաղվել է գործի քննությամբ:
Ջոն Կյուսակը կխաղա Հանսենի դերը, իսկ Գլեն Ֆլոտին կմարմնավորի Նիկոլաս Քեյջը: Ֆիլմի թողարկմամբ կզբաղվի Envision Entertainment-ը, սցենարիստն ու ռեժիսորը Սքոտ Ուոլքերն է: Նոր նախագծի աշխատանքները սկսելու ժամկետը հայտնի չէ: Հանսենի պատմությունը ցանկացել են էկրանավորել դեռ 2007-ին, երբ նկարահանվել է «Մերկ վախը» ֆիլմը: