Հայաստանում 1-1․5 տարվա ընթացքում միասնական երթուղային ցանց կգործի։ Կարգը մշակված է, ծրագրային ապահովումը կա, մշակվում է մրցույթի անցկացման կարգը: Այս մասին ԱԺ-ում հայտնել է ՀՀ տարածքային կառավարման և ենթակառուցվածքների փոխնախարար Արմեն Սիմոնյանը։
«Գտնվում ենք այն փուլում, որ մշակում ենք մրցութային կարգը: Որոշակի պայմաններ ենք սահմանում: Այդ կարգը ներկայումս գտնվում է կառավարությունում, հենց նոր կարգը ընդունվի, մրցույթները կհայտարարվեն»,- ասաց Սիմոնյանն ու հույս հայտնեց, որ կարգը 1-1.5 ամսվա ընթացքում կընդունվի:
Կարգի ընդունումից անմիջապես հետո կհայտարարվի մրցույթը: Մրցույթն ըստ կարգի հայտարարվում է համակարգի ներդրումից 3 ամիս առաջ:
Փոխնախարարի խոսքերով՝ միասնական երթուղային ցանցի ներդրումից հետո էլ միջհամայնքային երթուղիները պետք է սպասարկեն մասնավոր ընկերությունները:
ՀՀ փոխադրողների միության նախագահ Հրանտ Եղիազարյանը կարծում է, որ այս միասնական համակարգը որևէ բան չի փոխի երթուղային սպասարկման ոլորտում։
«Ո՛չ որակի, ո՛չ քանակի, ո՛չ սպասարկման հետ կապված ոչ մի փոփոխություն չի կարող լինել։ Հիմա էլ նույն մասնավորը սպասարկում է, հետո՞։ Էլի մաշված մեքենաներով փոխադրում են իրականացնելու»,- «Առաջին լրատվական»-ի հետ զրույցում ասաց Հրանտ Եղիազարյանը։
Նրա խոսքերով՝ մասնավոր ընկերությունները, մասնագիտական շահագրգիռ շրջակաները տեղյակ չեն այս որոշումից, որևէ հանրային քննարկում տեղի չի ունեցել։ «Հանրային քննարկում տեղի չի ունեցել։ Իրենք նստել իրենց աշխատասենյակներում միասնական երթուղային ցանց են ստեղծել։ Կամ ի՞նչ է նշանակում միասնական երթուղային ցանց։ Ենթադրենք՝ Հրազդանում լավ սպասարկում է, Վայքում՝ ոչ։ Ի՞նչ են անելու։ Վայքից տանելու են Հրազդա՞ն, թե՞ այնպիսի ֆանտաստիկ բաներ են մտածելու, որ մարդկանց նորմալ սպասարկի։ Հնարավոր չէ դա»,- նշեց Հրանտ Եղիազարյանը՝ հիշեցնելով, որ նախկին իշխանությունների օրոք Արմավիրում փորձեցին նման մի կարգ ներդնել, որը տապալվեց։
Փոխադրողների միության նախագահը շեշտեց, որ մենք այսօր ունենք բազմաթիվ գյուղեր, որոնք կազմակերպված երթուղային սպասարկում չունեն, մեքենա չի մտնում այդ գյուղեր, մարդիկ փոխադրում իրականացնում են պատահական մեքենաներով։
«Եթե իրենց ասածով մեքենաների թվաքանակի կրճատում է տեղի ունենալու, ապա ինչպես ենք սպասարկելու քաղաքացիներին, երբ հիմա, ունենալով այսքան շատ սպասարկող մեքենաներ, չենք կարողանում իրականացնել նորմալ երթուղային սպասարկում»,- հարցադրում արեց Փոխադրողների միության նախագահ Հրանտ Եղիազարյանը։