ՀՀ առողջապահության նախարարությունը որոշում է կայացրել դադարեցնել ՀՀ ԱՆ պրոֆ․Ռ․Յոլյանի անվան Արյունաբանական կենտրոնի տնօրեն Սամվել Դանիելյանի պայմանագիրը, որին հետևել է Հայաստանի մանկական քաղցկեղի եւ արյան հիվանդությունների կենտրոնի ղեկավար Գևորգ Թամամյանի ազատման դիմումը։ Մանկական քաղցկեղի և արյան հիվանդությունների կենտրոնի 41 բժիշկ ևս ազատման դիմում է ներկայացրել։
Գևորգ Թամամյանն «Առաջին լրատվական»-ի հետ զրույցում ասաց, որ խնդիրը մեկ լուծում ունի՝ կամ տնօրենը՝ Սամվել Դանիելյանը մնում է, կամ իրենք բոլորը միասին հեռանալու են։ «2018 թվականի հեղափոխությունից հետո բժիշկ Սամվել Դանիելյանը հրավիրվեց ու նշանակվեց արյունաբանական հիվանդանոցի տնօրեն, որպեսզի իրականացվեն արյունաբանության, մանկական ուռուցքաբանության զարգացման ծրագրեր, ինչն արվեց լավագույն ձևով։ Իսկ հիմա, առանց որևէ բացատրության, պատճառաբանության, ծիծաղելի հիմնավորումներով փորձում են Սամվել Դանիելյանին աշխատանքից ազատել։ Այն էլ Դանիելյանի պես մեծությանը աշխատանքից ազատման մասին տեղեկացնում են Մալբրի համակարգով, որ հոկտեմբերի 1-ից իր պայմանագիրը լուծարվում է»,- ասաց Թամամյանը՝ հավելելով, որ այս պահին առողջապահության նախարարությունը որևէ հոդաբաշխ բացատրություն չունի, թե ինչով է պայմանավորված որոշումը. «Բայց ես իմ կարծիքը կասեմ, որը շատերը կիսում են, այս որոշումը պայմանավորված է նախարարի կողմից նեղ անձնական, թայֆայական մոտեցմամբ։ Նախարարը շփման խնդիր ունի կայացած մարդկանց հետ։ Աշխատող հիմնարկը նման ձևով քանդելը տրամաբանական չէ։ Իսկ հոկտեմբերի 1-ից Հայաստանում չեն լինելու մանկական ուռուցքաբան ու արյունաբան, եթե Դանիելյանը հեռացվի աշխատանքից։ Իսկ Հայաստանում այլ մասնագետներ չկան»,- ասաց Թամամյանը։
Առավել մանրամասն՝ տեսանյութում։
