Բժիշկները, որոնք առաջին օգնությունն են ցուցաբերել Ալեքսեյ Նավալնիին այն բանից հետո, երբ նրա ինքնազգացողությունը վատացել է ինքնաթիռում, չեն հաստատել շաքարախտի վարկածը: Այս մասին հաղորդում է Reuters-ը՝ իրավիճակին ծանոթ հինգ աղբյուրներին հղումով:
Գործակալության երեք զրուցակիցների խոսքով, նրանք Նավալնիի մոտ նյութափոխանակության խանգարումներ չեն հայտնաբերել: Նրանց խոսքով, ինքնաթիռում կատարված գլյուկոզի թեստը ցույց է տվել, որ նրա արյան մեջ շաքարը համապատասխանում է նորմային (3-5 մմոլ/լ):
«Ոչ մի շաքարախտ չկար, ամեն ինչ անմիջապես ստուգել են և բացառել այդ տարբերակը»,- ասել է Reuters-ի զրուցակիցներից մեկը:
Գործակալության հինգ զրուցակիցներից չորսը նույնպես նշել են, որ հիվանդի մոտ թունավորման կլինիկական պատկեր է եղել, նյութափոխանակության խանգարման որևէ նշան չի եղել:
«Նավալնին ստուպորի մեջ էր, գիտակցությունը մթագնած, նա ոչինչ չէր կարողանում բացատրել»,- հավելել է աղբյուրներից մեկը:
Միևնույն ժամանակ, Օմսկի մարզի և Սիբիրի դաշնային շրջանի գլխավոր թունաբան Ալեքսանդր Սաբաևը հերքել է Reuters-ի զրուցակիցների խոսքերը: Նա հայտարարել է, որ Նավալնիի արյան մեջ շաքարը եղել է 13 մմոլ/լ, ինչը գերազանցում է նորման: