Թերթը հայտնում է, որ մոտ տասը օր առաջ քաղաքացի Նատալյա Հարությունյանը Երևան–Բաթում-Երևան չվերթի տոմսեր է գնել «Արմավիա»-ի՝ Սայաթ-Նովա և Նալբանդյան փողողների խաչմերուկում գտնվող գրասենյակից։
Չվերթի օրը, որը երկու օր առաջ էր, պարզվել է, որ նման չվերթ գոյություն չունի.
«Նախորդ օրը ես զանգեցի «Զվարթնոց» օդանավակայան, որտեղ ոչ ոք չգիտեր այդ չվերթի մասին։ Սկսեցի վախենալ, զանգեցի «Արմավիա», աղջիկը համակարգչով մեր տոմսերը ստուգեց, ասաց, թե վախենալու բան չկա, չարտերային թռիչք է»,- պատմել է Նատալյան ու նշել, որ հաջորդ օրը, արդեն, երբ օդանավակայանից են զանգել «Արմավիա», իրենց ասել են, թե չվերթը պետք է սպասարկեին Georgian Airways-ի ինքնաթիռները, խափանման մեղքը նրանցն է։
«Իսկ Georgian Airways-ը, իր հերթին, մեղքը գցել է «Արմավիա»-ի վրա՝ ասելով, թե չվերթերը հանվել են, և «Արմավիան» պետք է դրա մասին տեղյակ պահեր, քանի որ ինքն է տոմսերը վաճառել»,- հավելում է «Երկիր»-ը։
