Ռոբերտ Քոչարյանը շարունակում է հարցազրույցներ տալ։ Այս անգամ էլ հարցազրույց է տվել ռուսական РБК հեռուստաընկերությանը, որում անդրադարձել է Հայաստանում կառավարման խորհրդարանական ձևին, նշել, որ այդ ձևը չի համապատասխանում, քանի որ ներկուսակցական ժողովրդավարության բացակայության պայմաններում կառավարման խորհրդարանական ձևը վերածվում է կուսակցական բոսի միանձնյա իշխանության, և որ Հայաստանի ոչ մի նախագահ չուներ այն ուժը, որն ունի այսօր երկրի վարչապետը:
ԳԽ նախկին պատգամավոր, նախկին քաղբանտարկյալ Ազատ Արշակյանը «Առաջին լրատվական»-ի հետ զրույցում, անդրադառնալով Քոչարյանի վերջին հարցազրույցներին, նշեց, որ ի սկզբանե, երբ Ռոբերտ Քոչարյանը եկել էր ՀՀ, անհամարժեք է եղել, և եթե համարժեք լիներ և տեղյակ լիներ հայկական իրականությանը, մենք այսօր կխոսեինք Ռոբերտ Քոչարյան նախագահի մասին. «Մենք այսօր խոսում ենք, սակայն, Ռոբերտ Քոչարյան ամբաստանյալի մասին, այսինքն՝ մարդը համարժեք չի, ՀՀ-ում ապրելու համար չի պատրաստվել, պատրաստվել է Սումգայիթում 2 սենյականոց կվարտիրա ունենալու, և ռայկոմներից մեկում, քանի որ հայեր շատ կան, հայերի հետ աշխատող հրահանգիչ լինելու։ Պերեստրոյկան փոխեց նրա ծրագիրը, և նա հայտնվեց իր համար օտար և անհասկանալի միջավայրում»։
Անդրադառնալով Քոչարյանի դիտարկումներին՝ 10 տարին մեկ Սահմանադրություն փոխելու մասին, Արշակյանը նշեց, որ նա չի հասկանում, թե ինչ կարգավիճակ ունի, ինչ Սահմանադրության մասին է խոսում, ինքը պետք է մտածի իր քրեական գործի պաշտպանության մասին, և այդ ծրագրերը պետք է լինեն քրեական գործի հետ կապված: «Նա քաղաքականությունում հայտնվել է պատահաբար։ Հիմա ինքը պետք է մտածի իր պաշտպանության մասին, պետք է խորհրդակցի իր փաստաբանների հետ, իսկ Սահմանադրություն, ընտրություններ… դրանք արդեն իր գործը չեն, դրանք այն ժամանակ էլ իր գործը չեն եղել, նա այն ժամանակ էլ չի կարողացել կազմակերպել ՀՀ կյանքը, տնտեսությունը, ՏԻՄ-ը, ՀՀ հարաբերությունները աշխարհի հետ և վերջապես իր մադրիդյան բանաձևերը, դրանք բոլորը ձախողումներ են: Այն ժամանակ, երբ հազար օգնական է ունեցել, ճիշտ վճիռներ չի կայացրել, հիմա ինչպես կարող է սահմանափակ օգնականների միջոցով ճիշտ որոշումներ կայացնել։ Քաղաքական կարծիք նա չի կարող հայտնել, քանի որ ոչ պրոֆեսիոնալ է։ Մարդը տասը տարի եղել է նախագահ և այսօր մեղադրվում է պետական հանցագործության և կոռուպցիոն հանցագործությունների մեջ»,- հավելեց Արշակյանը։
Անդրադառնալով ընդդիմադիրների՝ հանրահավաքներ անցկացնելու հայտարարություններին՝ Արշակյանը նշեց, որ, իհարկե, հանրահավաքներ, քաղաքական ակցիաներ կլինեն, Հայաստանը ժողովրդավարական երկիր է, իշխանությունը փոխվելու է, բայց Հայաստանը հետ չի գնալու, առաջ է գնալու, նոր մարդիկ են գալու՝ նոր ծրագրերով. «Ես ասում եմ՝ որ ոչ մի բան էլ եղած չլիներ, միայն այն, որ նա նման կարգավիճակում է, ամբաստանյալը այլ կարգավիճակ է, նրա կարծիքը քաղաքական կարծիք չէ, բոլորովին այլ բնագավառ է, թեժ գարուն կլինի, թեժ ցուրտ ձմեռ կլինի, բայց ինքը ինչ կապ ունի դրա հետ, նա անցած է»։
Ինչ վերաբերում է ՌԴ նախագահ Պուտինի՝ Քոչարյանին ուղղված շնորհավորանքներին, ապա, ըստ Արշակյանի, նրան կարող է շնորհավորել նաև այլմոլորակային որևէ մեկը, բայց կարգավիճակը նրա քաղաքական գնահատականն է. «Իսկ ով ասաց, որ Պուտինի կարգավիճակը որոշ ժամանակ անց ավելի լավն է լինելու։ Մենք հույս ունենք, որ նրանք, որպես ճակատագրով հանցակիցներ, կհանդիպեն բանտում, և այդ շնորհավորանքը այնքան էլ հօգուտ Ռոբերտ Քոչարյանի չէ։ Ասա՝ ընկերդ ով է, ասեմ՝ դու ով ես։ Գերհզոր, բարգավաճող, առաջ գնացող ՌԴ-ն հայտնվել է անկյուն քշված, աշխարհի կողմից մեկուսացված վիճակում։ Սա է Պուտինը, անգամ եվրոպական երկրների ությակից է վտարված և հազար ու մի պատժամիջոցների տակ է, հենց դա էլ իր ընկերն է։ Մարդը, որ իզգոյ է դարձրել գերհզոր ՌԴ-ն, եվրոպական ՌԴ-ն դարձրել է Ասիա, խանություն, ինչ շնորհավորելու բան է. Քադաֆին որ ողջ լիներ, նա էլ կարող էր շնորհավորել»։