Արդեն երկրորդ տարին է՝ «Կրեդիտ Երևան» բանկ ԲԲ ընկերության և «Լև Մարսեդ» ՍՊ ընկերության առանձնապես խոշոր չափերի արժեք ունեցող բաժնետոմսերը առերևույթ խարդախությամբ հափշտակելու դեպքի առթիվ քրգործ է հարուցվել, սակայն որևէ մեկին մեղադրանք չի առաջադրվել:
«Առաջին լրատվական»-ի հետ զրույցում ռուսաստանաբնակ հայ գործարար Լևոն Մարկոսը մտահոգություն է հայտնել շարունակ ձգձգվող դատական գործընթացների վերաբերյալ:
– Պարոն Մարկոս, ի՞նչ ընթացքում է հարուցված քրեական գործը, կա՞ն նորություններ:
– Դեռ առանձնապես նորություններ չկան, միայն խոսակցություններ են: Այս գործը պետք է վաղուց ավարտեին, բայց անցավ բավական երկար ժամանակ, սրանք էսօր-վաղը ասելով ձգձգում են: Ինչ-որ խաղեր են գնում: Ես դեռ չեմ ուզում որևէ բան անել, տեսնենք՝ ինչ կլինի:
– Ընդհանուր առմամբ, այս դատական գործընթացը որքանո՞վ է բավարարում Ձեզ:
– Իմ դեմ ուղղված քայլերը ղեկավարել է Կենտրոնական բանկի այն ժամանակվա նախագահ Տիգրան Սարգսյանը: Հիմա, երբ ամեն ինչ բացվել է, պարզ է դառնում, որ դա իրար հետ միասին կազմակերպել են Տիգրան Սարգսյանը, Սերժ Սարգսյանն ու Ռոբերտ Քոչարյանը: Ես այն ժամանակ էլ էի դա հասկանում, որ նրանք միասին են գործել: Նրանք ինձ բերեցին մտցրին դրա մեջ՝ ասելով, որ հանրապետությունը վատ վիճակի մեջ է, արի փրկի բանկը, իսկ իրենք, պարզվում է, բավականին մեծ գործերի մեջ են եղել: Ես այդ ընթացքում բավական մեծ փողեր եմ տվել: Իրենք սնանկացած բանկը, որը վաճառելու իրավունք չեն ունեցել, խաբեությամբ վաճառել են ինձ: Ես էլ նաիվ ձևով հավատացել եմ և 28 մլն դոլար տվել եմ իրենց, իսկ այդ բանկից ոչինչ չեմ վերցրել: Բացի այդ, իրենք իմ գործարանները, շուկաները վերցրին: Ես արդեն շատ ավելի ուշ իմացա, որ իմ գործարանները, շուկաները տվել են սրան-նրան, իրենց հարազատներին: Դրա համար ես հիմա շատ վճռական եմ տրամադրված, այս անգամ արդեն վերջին անգամ է լինելու, և ես ակտիվ գործելու եմ: Ես հիմա մտադիր եմ գրել երկրի վարչապետին, գլխավոր դատախազին և խնդրելու եմ մարդկային լեզվով, որ գործն առաջ ընթանա: Ես հավատացել ու հավատում եմ իրենց, բայց դա չի նշանակում, որ իրենք իրավունք ունեն ինձ միշտ խաբելու:
– Ինչպիսի՞ն է Ձեր կարծիքն այսօր Հայաստանում գործող դատական համակարգի վերաբերյալ: Տեսակետ կա, որ նախկիններին պատասխանատվության կանչելու գործընթացը շատ է ուշանում:
– Ես չէի ուզում այդ հարցերով անհանգստացնել իշխանություններին, որովհետև, բացի դատականից, նոր իշխանությունները շատ այլ խնդիրներ ունեն: Այդ իմ նշած մարդիկ սեփականություններ են խլել, բոլորն էլ գիտեն դրանց մասին: Դուք հիշում եք, թե քանի մարդ լքեց երկիրը, հեռացավ: Ես էլ մտածում էի՝ թող նոր իշխանությունները առաջին հերթին երկրի հարցերը լուծեն, իմը կոնկրետ շատ պարզ հարց է՝ «գցել են» պարզապես: Հետո իմ նկատմամբ հետախուզում հայտարարեցին, որ ես Հայաստան չգամ, որի իրավունքը չունեին: Այդ ընթացքում վերցրին իմ ունեցվածքը և ծախեցին իրենց շրջապատի մարդկանց: Մեկը տալիս է Դոդի Գագոյին, մեկը՝ Լֆիկ Սամոյին: Ինչպե՞ս դա հասկանանք: Հիմա ժամանակն է, որ այդ արածների համար մարդիկ պատժվեն: Ես իմ գործերը Հայաստանում սկսեցի այն ժամանակ, երբ բոլորը փախչում էին, ոչ մեկը ոչ մի բան չէր անում:
