Թուրքական Hürriyet թերթի փոխանցմամբ՝ Թուրքիայի խոշորագույն ընդդիմադիր «Ժողովրդա-հանրապետական» կուսակցությունը (ԺՀԿ) որոշում է ընդունել դիմել Մարդու իրավունքների եվրոպական դատարան (ՄԻԵԴ)՝ իր նորընտիր պատգամավորներ Մուսթաֆա Բալբայի ու Մեհմեդ Հաբերալի ազատ արձակմանը հասնելու համար։
Նրանք ձերբակալվել են «Էրգենեկոն» ահաբեկչական կազմակերպության գործի շրջանակներում։ Չնայած երկար ժամանակ է, ինչ նրանք գտնվում են բանտում, այնուամենայնիվ նրանց դեմ դեռ մեղադրանք չի հարուցվել։
ԺՀԿ խորհրդարանական խմբակցության ղեկավար Էմինե Ուլքեր Թարհանը, սակայն, չի հստակեցրել, թե կոնկրետ երբ է ԺՀԿ-ն դիմելու ՄԻԵԴ։
Հիշեցնենք, որ հենց Բալբայի ու Հաբերալի պատճառով էր ԺՀԿ-ն բոյկոտել Թուրքիայի Ազգային մեծ ժողովի (ԹԱՄԺ) երդման արարողությունն ու առաջին նիստերը։ Սակայն երբ ԺՀԿ-ն հայտնվեց խորհրդարանից դուրս մնալու վտանգի առջև, նա համաձայնեց երդում տալ ու մասնակցել խորհրդարանի նիստերին։
