Արցախի նախագահի խոսնակ Վահրամ Պողոսյանը ֆեյսբուքյան իր էջում գրել է․
Սպասելի էր, որ Սամվել Բաբայանի երեկվա հարցազրույցից հետո «քարկոծումներ» կլինեն, բայց հավատում եմ առողջ բանականության ուժին, և համոզված եմ, որ այս պարագայում ևս այն հաղթող է: Արձագանքելով այս թեմայի շուրջ որոշ շահարկումների՝ նշեմ, որ որևէ մեկի մենաշնորհը չէ որևէ հայի իր հայրենիք այցելելու, ապրելու և օգտակար գործով զբաղվելու համար թույտվություն տալը: Եվ Սամվել Բաբայանին ոչ ոք չի ուղարկել իր հայրենիք:
Կարծում եմ՝ վիրավորական է այդպիսի մեղադրանք ներկայացնել մի մարդու հասցեին, ով այդ հայրենիքի ազատության համար մեծ ավանդ է ներդրել:
Սամվել Բաբայանին քաղաքական գործունեության իրավունք տվել է Արցախի 17.365 քաղաքացի, կամ ընտրողների 23.63 տոկոսը, և նրա ղեկավարած «Միասնական հայրենիք» կուսակցության հետ քաղաքական դաշինք կազմելու, իսկ նրա առաջնորդին ԱՀ Անվտանգության խորհրդի քարտուղարի պաշտոնում նշանակելու որոշումը կայացրել է անձամբ Հանրապետության նախագահ Արայիկ Հարությունյանը՝ հաշվի առնելով ու հարգելով ժողովրդի քվեն և նրա կերպարը: