Ուղիղ 30 տարի առաջ այս օրը՝ 1990 թվականի օգոստոսի 23–ին Հայկական ԽՍՀ Գերագույն խորհրդի առաջին նստաշրջանում ընդունվեց Հայաստանի անկախության հռչակագիրը։ Դրանով ազդարարվեց Հայաստանի անկախ պետականության հաստատման գործընթացի սկիզբը։
Անկախության հռչակագիրը Հայաստանի նորանկախ Հանրապետության հիմնարար, անկյունաքարային, համակարգաստեղծ փաստաթուղթն է, որն իր մեջ ամփոփում է մեր ազգային իղձերն ու երազանքները, պետության ու պետականության կայացման, երկրի ներքին ու արտաքին քաղաքականության իրականացման առաջնահերթությունները։
Հենց Անկախության հռչակագրի ոգուն ու տառին համապատասխան հետագա տարիներին կազմավորվեցին պետության ու պետականության առանցքային համակարգերն ու կառուցակարգերը՝ Սահմանադրությունը, պետական կառավարման մարմինները, հանրային, տնտեսական կյանքի նորմերն ու իրավահարաբերությունները։ Անկախության հռչակագիրը ՀՀ Սահմանադրության հետ միասին իրավամբ համարվում է Հայաստանի Հանրապետության հիմադիր փաստաթուղթը, նրա վրա է խարսխված ՀՀ Սահմանադրությունը։ Եվ ամենևին պատահական չէ, որ ՀՀ Սահմանադրությունը սկսվում է հետևյալ պարբերությամբ՝ «Հայ ժողովուրդը, հիմք ընդունելով Հայաստանի անկախության մասին հռչակագրում հաստատագրված հայոց պետականության հիմնարար սկզբունքներն ու համազգային նպատակները… ընդունում է Հայաստանի Հանրապետության Սահմանադրությունը»։
Անկախության հռչակագրի ընդունումը անկախ պետության ու պետականության կայացմանն ուղղված առաջին խոշոր քայլն էր, որն ունի ինչպես պատմական, այնպես էլ իրավաքաղաքական հսկայական նշանակություն։
Անցած 30 տարիները ցույց են տվել Անկախության հռչակագրի ու նրա դրույթների կենսունակությունն ու այժմեականությունը, հենց դա է պատճառը, որ չնայած անցած երեք տասնամյակներին տեղի ունեցած բազմաթիվ ներքին ու արտաքին վայրիվերումներին, ճգնաժամերին ու սպառնալիքներին, երբևէ Անկախության հռչակագիրն ու նրա սկզբունքները կասկածի տակ չեն առնվել, որովհետև դրանք գործնականում անքննարկելի են ու անվերապահելի, դրանք մեր պետության հավիտենական հենասյուներն են։
Սրտանց շնորհավորում եմ ՀՀ քաղաքացիներին, համայն հայ ժողովդրին մեր պետության ու պետականության ստեղծման անկյունաքարային իրադարձության՝ Անկախության հռչակագրի ընդունման 30–ամյակի կապակցությամբ։
Կեցցե Հայաստանի անկախ Հանրապետությունը
https://www.facebook.com/2299952536702127/posts/3570970232933678/
