Ամերիկյան Washington Times թերթը, վկայակոչելով Կենտրոնական հետախուզական վարչության (ԿՀՎ) գաղտնի զեկույցը, հայտնում է, որ 2010 թվականի աշնանը Թբիլիսիում տեղի ունեցած պայթյունը կազմակերպել է ռուսական հետախուզությունը՝ Գլխավոր հետախուզական վարչությունը (ԳՀՎ)։
Թերթը հենվում է ԱՄՆ կառավարությունում ունեցած երկու աղբյուրների վրա՝ չբացահայտելով նրանց անունները։ Վերջիններիս վստահեցմամբ՝ ԿՀՎ-ի զեկույցը հաստատում է Վրաստանի ՆԳՆ-ի իրականացրած հետազոտության արդյունքները։
Աղբյուրներից մեկը հայտարարել է, որ զեկույցը կազմված է բավական միանշանակ և հաստատում է տեղի ունեցածի վերաբերյալ վրացական տարբերակը՝ հավելելով, որ զեկույցում հենց ԳՀՎ-ն է մեղադրվում պայթյունների կոորդինացման մեջ։
Մյուս աղբյուրը վստահեցնում է, որ զեկույցում նշված է մայոր Բորիսովի մասին, որը, ինչպես վստահեցվում է, մասնակցություն է ունեցել այդ պայթյուններին։
Սակայն ամերիկյան թերթը հայտնում է, որ ԿՀՎ-ի զեկույցում խոսք է գնում ոչ միայն այդ երկու պայթյունների, այլև նախորդ տարի Վրաստանի տարածքում տեղի ունեցած այլ պայթյունների մասին։
Հիշեցնենք, որ 2010 թվականի դեկտեմբերի 7-ին Վրաստանը հայտարարեց իր 6 քաղաքացիների ձերբակալության մասին, որոնք կասկածվում էին ռուս սպա Բորիսովի պատվերով ահաբեկչությունների սերիա կազմակերպելու մեջ։ Այն ժամանակ պայթյուններից երկուսը տեղի էին ունեցել ԱՄՆ դեսպանատան շենքի և ընդդիմադիր Լեյբորիստական կուսակցության գրասենյակի հարևանությամբ։
2011 թվականի հունիսի վերջին վրացական դատարանը Վրաստանի 5 քաղաքացիներին դատապարտեց 30-ամյա ազատազրկման՝ Մոսկվայի հանձնարարությամբ ահաբեկչություններ կազմակերպելու մեղադրանքով։
