Այսօր տեղի է ունեցել ՀՀ երրորդ նախագահ Սերժ Սարգսյանի մամուլի ասուլիսը, որը նրա պաշտոնաթողությունից հետո առաջինն էր և բացառապես վերաբերում էր Ապրիլյան պատերազմին:
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ, «Հանուն հանրապետության» նախաձեռնության անդամ Ռուբեն Մեհրաբյանը, «Քաղաքացիական պայմանագիր» կուսակցության հանրային կապերի պատասխանատու Վահագն Ալեքսանյանը, «Հայ կառուցողական կուսակցության» նախագահ Անդրիաս Ղուկասյանը:
«Սերժ Սարգսյանը ասուլիսի վայրը որոշելու առումով պրագմատիկ էր գտնվել, կարծես թե նա գովազդում էր այդ ռեստորանային համալիրը: Իսկ ժամանակի առումով՝ Սերժ Սարգսյանի ասուլիսը նախորդեց ԱԺ Ապրիլյան պատերազմի հանգամանքներն ուսումնասիրող հանձնաժողովի սպասվելիք զեկույցին: Սարգսյանը որոշել էր հրապարակել իր ուղերձը՝ ուղղված այդ հանձնաժողովին, նրա թիրախային խնդիրն այն էր, որ հրապարակի իր տեսլականը և Ապրիլյան պատերազմի մասին իր թեզերը դարձնի հանրային»,- նշեց Անդրիաս Ղուկասյանը:
Ռուբեն Մեհրաբյանի խոսքով՝ Սերժ Սարգսյանը փորձում է խաղալ մինչև ԱԺ քննիչ հանձնաժողովի զեկույցի հրապարակումը՝ հավանաբար ինչ-որ մտավախություններ ունենալով և առաջանցիկ կերպով տեղեկություններ հաղորդելով: «Ասուլիսի սկիզբը Սերժ Սարգսյանի «անկեղծության» բեմականացում էր, հետո սեփական դերի «պարզաջրում», այնուհետև ռուսների «պարզաջրում» և այլն»,- նշեց քաղաքագետը:
Վահագն Ալեքսանյանի դիտարկմամբ՝ Ս. Սարգսյանի բերած պատճառները, որ արտակարգ դրությունը կարող է անվերջ երկարաձգվել, համոզիչ չէին:
Անդրիաս Ղուկասյանի խոսքով՝ Սերժ Սարգսյանի ասուլիսում շոուի բաղադրիչներ կային. «Նրա նպատակներից էր փոխել իմիջը՝ ԶԼՄ-ների մասնակցությամբ… Սերժ Սարգսյանին հաջողվեց ինտրիգ պահել… Նրա գլխավոր նպատակը իրեն վերագրվող մեղադրանքներից իր կերպարը մաքրելն է»:
Մանրամասն՝ տեսանյութում:
