Հայաստանի Մարդկային ռեսուրսների ասոցիացիան Ֆիլիպ Մորրիս Արմենիա ընկերության հետ համատեղ մեկնարկում են «Աշխատող ԳործON» նախագիծը, որի նպատակն է աջակցել կորոնավիրուսի տնտեսական հետևանքներից տուժած ու աշխատանքը կորցրած հայերին։ Բոլոր հետաքրքրվածները կստանան մասնագիտական ուղղորդում, հնարավորություն կստանան պրակտիկա կամ աշխատանք ունենալ Հայաստանի խոշորագույն ընկերություններում։
Կորոնավիրուսի պանդեմիան իր բացասական հետևանքներն է ունեցել ինչպես համաշխարհային առողջապահության, այնպես էլ տնտեսության վրա։ Շատ երկրներում՝ այդ թվում նաև Հայաստանում, տնտեսական ակտիվության անկման հետևանքով բազմաթիվ քաղաքացիներ կորցրել են իրենց աշխատանքն ու զրկվել եկամուտի աղբյուրից։ Միևնույն ժամանակ, կորոնավիրուսի պայմաններում աշխատանքի կազմակերպման ձևաչափի փոփոխման հետևանքով շատ աշխատակիցներ անմրցունակ են դարձել՝ համապատասխան ձիրքերի ու հմտությունների բացակայության պատճառով։
Ինչպե՞ս կարելի է օգնել մարդկանց հաղթահարել կորոնավիրուսի հետևանքները․
Արձագանքելով իրավիճակային մարտահրավերներին ու կարևորելով Հայաստանում աշխատանքը կորցրած մարդկանց աջակցություն ցուցաբերելը՝ Հայաստանի Մարդկային ռեսուրսների Ասոցիացիան Ֆիլիպ Մորրիս Արմենիա ընկերության հետ համատեղ մեկնարկում են «Աշխատող ԳործON» նախաձեռնությունը։ Կազմակերպիչները փորձելու են աջակցել աշխատանքն ու եկամտի աղբյուրը կորցրած մարդկանց, ինչպես նաև նպաստել Հայաստանում տնտեսական ակտիվության բարձրացմանը։
«Աշխատող ԳործON» նախաձեռնությունը միավորելու է այն անհատներին ու ընկերություններին, որոնք պատրաստ կլինեն առցանց վեբինարների միջոցով արդի մասնագիտությունների վերաբերյալ օգտակար գիտելիքներ տրամադրել, ինչպես նաև առաջարկել մենթորություն, պրակտիկա կամ աշխատանք իրենց ընկերություններում։
Նախաձեռնությանն արդեն իսկ միացել են իրենց ոլորտում առաջատար մի քանի ընկերություններ, ինչպիսիք են Cascade People & Business խորհրդատվական ընկերությունը, Արմենիա վայն գինեգործարանը, Lumen նկարահանման ստուդիան, Skill կրթական միջոցառումների կազմակերպման ընկերությունը, Zuck Independent Agency գովազդային գործակալությունը։
Ինչպե՞ս կկարողանաք միանալ ծրագրին․
Մարդկային ռեսուրսների ասոցիացիան ու Ֆիլիպ Մորրիսն ապահովում են առցանց հարթակ՝ gortson.am վեբ կայք, որը համախմբում է առաջկցող անհատներին ու ընկերություններին։ Ծրագրին միանալու համար մասնակիցներին բավարար է առցանց գրանցվել՝ լրացնելով ձևաթուղթը և հետևելով ծրագրի կազմակերպիչների հաղորդագրություններին։
Ի՞նչ կստանաք, եթե մասնակցեք․
Ծրագրին ԱՆՎՃԱՐ կարող են մասնակցել բոլոր ցանկացողները Երևանից ու շրջաններից։ «Աշխատող ԳործON»-ը կօգնի նրանց ստանալ մասնագիտական վերապատրաստում, անցնել պրակտիկա բիզնես ոլորտի առաջատար ընկերություններում, ստանալ աշխատանքի հնարավոր առաջարկ ու օգտվել անվանի փորձագետների մենթորությունից։
Ովքե՞ր են ծրագրի կազմակերպիչները․
10 տարի շարունակ Հայաստանի մարդկային ռեսուրսների (ՄՌ) Ասոցիացիան միավորում է հայաստանյան ՄՌ համայքը, նպաստում ոլորտի զարգացմանը` նախաձեռնելով մի շարք նախագծեր տարբեր բնագավառներում։
Ներկայումս ասոցիացիան ունի ավելի քան 80 անդամ, որոնք հանդիսանում են ոլորտի առաջադեմ մասնագետներ և համախմբվել են ընդհանուր նպատակների իրականացման շուրջ:
Կորոնավիրուսով պայմանավորված իրավիճակը չխանգարեց ասոցիացիային, որպեսզի շարունակի հավատարիմ մնալ իր արժեքներին։ Համաճարակի ընթացքում կազմակերպվեցին մասնագիտական զարգացմանը նպաստող անվճար վեբինարներ, անձնակազմի ղեկավարներին տրամադրվեց մասնագիտական աջակցություն դժվարին իրավիճակում խնդիրները լուծելու համար, ստեղծվեց ՄՌ պրոֆեսիոնալ հարթակ, որը մասնագիտական փորձի փոխանակման, ինքնաարտահայտվելու և բազում հարցերի պատասխաններ ստանալու հնարավորություն է տալիս։
Ֆիլիպ Մորրիս Արմենիան Ֆիլիպ Մորրիս Ինթերնեյշնլ առաջատար միջազգային ընկերության դուստր ձեռնարկությունն է: Հավատարիմ լինելով հասարակության հետ համընդհանուր արժեք ստեղծելու իր նպատակին, Ֆիլիպ Մորրիս Արմենիա ընկերությունը պատրաստակամ է հասարակության հետ կիսել նաև առկա խնդիրներն ու մարտահրավերները։
Համաշխարհային մակարդակով Ֆիլիպ Մորրիս Ինթերնեյշնլը մոտ 35 մլն դոլարի աջակցություն է ցուցաբերել կորոնավիրուսի դեմ պայքարին։ Հայաստանում ընկերությունը միացել է «Ապագա» բարեգործական հիմնադրամի կարևոր առաքելությանը` աջակցել պանդեմիայի պայմաններում ինքնամեկուսացման հետևանքով եկամտի աղբյուրը կորցրած անձանց։ Ընկերության կողմից տրամադրված մոտ 150 000 ԱՄՆ դոլար ֆինանսական աջակցության շնորհիվ հնարավոր եղավ ձեռք բերել սնունդ ու առաջին անհրաժեշտության պարագաներ պարունակող 14-օրյա փաթեթներ ինքնամեկուսացման մեջ գտնվող քաղաքացիների համար։ Կրթության հարատևությունն ապահովելու համար նաև ֆինանսավորվեց անապահով ընտանիքների երեխաների համար պլանշետների ձեռքբերումը։ Շատ ընտանիքների էլ Ֆիլիպ Մորրիսի աջակցությամբ բաժանվեցին բժշկական անհատական պաշտպանիչ միջոցներ։
