«Կարծում եմ՝ արտակարգ դրության ավարտից հետո այլևս դժվար կլինի վերահսկել քաղաքացիների կողմից հակահամաճարակային կանոնների պահպանման ռեժիմը, որովհետև, եթե ներկա դրությամբ՝ նրանք պարտադրված ձևով շարունակում են դրանք պահպանել՝ դիմակ կրել կամ սոցիալական հեռավորություն պահել և այլն, ապա արտակարգ դրության ավարտից հետո՝ այդ վերահսկողությունը, բնականաբար, կթուլանա և շատ ափսոս, որ այս ամիսների ընթացքում տարված ամբողջ աշխատանքը կարող է ջուրը ընկնել: Հետևաբար, հաշվի առնելով հենց այս հանգամանքը, իմ կարծիքով՝ այս մեկ ամսվա երկարաձգումը ճիշտ որոշում էր, չնայած այն հանգամանքին, որ սրան զուգահեռ մի շարք սահմանափակումներ թուլացվելու են, ինչը իր հերթին կօգնի, որ հեշտությամբ հաղթահարենք նաև այս մեկ ամիսը»,- «Առաջին լրատվական»-ի հետ զրույցում նշեց Ազգային Ժողովի «Իմ քայլը» խմբակցության պատգամավոր, ԱԺ-ի առողջապահության և սոցիալական հարցերի մշտական հանձնաժողովի անդամ Լուսինե Բադալյանը՝ անդրադառնալով արտակարգ դրության ևս մեկ ամսով երկարաձգելու կառավարության որոշմանը:
Բադալյանի կարծիքով՝ հիմա շատ մեծ դժվարությամբ Հայաստանը բռնել է համավարակի հաղթահարման ճանապարհը և համեմատաբար բարելավել է ամիսներ առաջ տիրող վիճակը:
«Եթե կարողանանք մի փոքր էլ մեզ սեղմած պահել, ապա կկարողանանք այս չարիքից գրեթե վերջնականապես դուրս գալ: Չնայած՝ շատ են խոսում 2-րդ ալիքի մասին, աշնանը կրկին թեժացումներ սպասելու մասին, բայց ես կարծում եմ, որ դա մեզ չի սպառնում, որովհետև որոշ ժամանակ հայտնվելով բավականին ծանր վիճակում՝ ինչ-որ տեղ կանխել ենք նաև 2-րդ ալիքի ներմուծումը մեր միջավայր: Կա արդեն հանրային այդ իմունիտետի ձևավորումը: Բացի այդ կան նաև այլ գործոններ, որոնք մեզ թույլ են տալիս վստահ չլինելու, բայց հուսալու, որ այդ 2-րդ ալիք ասվածը մեծ չի սպառնում»,- հավելեց պատգամավորը:
Մանրամասները՝ տեսանյութում:
