Այս տարվա առաջին կիսամյակում պետական բյուջեի եկամուտները նվազել են, ծախսերը՝ ավելացել։ Պակասուրդն առաջին կիսամյակում կազմել է 48 մլրդ 836.7 մլն դրամ:
Այսպիսով, Վիճակագրական կոմիտեն հրապարակել է պետական բյուջեի նախնական ամփոփ ցուցանիշները, ըստ որի՝ այս տարվա հունվար-հունիսին պետական բյուջեի եկամուտները կազմել են 716 մլրդ 700.6 մլն դրամ՝ 2019 թ.-ի նույն ժամանակահատվածի 758 մլրդ 502.5 մլն դրամի փոխարեն։ Պետբյուջեի ծախսերը 2020 թ.-ի առաջին կիսամյակում կազմել են 765 մլրդ 537.3 մլն դրամ՝ 2019թ.-ի նույն ժամանակահատվածի 636 մլրդ 637.2 մլն դրամի դիմաց։ Այսինքն՝ բյուջեի ծախսերն այս տարվա առաջին կիսամյակում աճել են 20.2 %-ով: Պետական բյուջեի եկամուտների 680 մլրդ 289.3 մլն դրամը գոյացել է հարկերից և տուրքերից։ 2019 թ.-ի առաջին կիսամյակի համեմատ այս տարվա նույն ժամանակահատվածում հավաքագրված հարկերի և տուրքերի ծավալը նվազել է. մասնավորապես՝ 2019թ. առաջին կիսամյակում հավաքագրվել էր 713 մլրդ 384.4 մլն դրամ հարկ ու տուրք։
«Կովկաս» ինստիտուտի գիտաշխատող, տնտեսագետ Հրանտ Միքայելյանի կարծիքով՝ այս պատկերը կանխատեսելի էր և պայմանավորված է այս ամիսների ընթացքում արձանագրված տնտեսական անկմամբ: Նրա խոսքով՝ պետք է նկատի ունենանք նաև այն, որ այս տարվա հունվարից արտերկրից Հայաստան մեքենաներ այլևս չեն ներմուծվում, հետևաբար դրանց մաքսազերծումից ստացվող գումարները ևս պետբյուջե չեն մտել:
«Ինչ վերաբերում է կառավարության իրականացրած ծախսերին, ապա պիտի հաշվի առնենք, որ համավարակի այս պայմաններում կառավարության կողմից ավելացել են առողջապահությանը հատկացվող գումարները, ինչպես նաև սոցիալական աջակցության մի շարք ծրագրեր են իրականացվել: Բացի այդ, եթե նայենք պետական բյուջեի ծախսերի կառուցվածքը, ապա պետական պատվերով ծառայությունների և ապրանքների գնումը 2020թ.-ին ավելի շատ է, քան, օրինակ, 2018-2019թթ.-ներին էր նախատեսված, որովհետև գործող կառավարությունը չէր վստահում նախորդ կառավարության կատարած ծախսերի հավաստիությանը, և ենթադրվում էր, որ այդտեղ կոռուպցիոն բնույթի ռիսկեր կային, հետևաբար հիմա արդեն այս կառավարության ծախսերի մասով բյուջեի կառուցվածքն այլ է, և կոռուպցիոն ռիսկերի մտավախություն այլևս չկա, ու ծախսերն էլ ավելի ինտենսիվ են արվում: Այսպիսով, եթե հաշվի ենք առնում այս բաղադրիչները, ապա, այո՛, թեև պակասուրդի մասով բացասական դինամիկա ունենք, սակայն մակրոտնտեսական տեսանկյունից ամեն ինչ նորմալ է, և անակնկալ որևէ բան չկա այստեղ»,- «Առաջին լրատվական»-ի հետ զրույցում շեշտեց տնտեսագետը:
Վերջինիս դիտարկմամբ՝ այս գումարները հնարավոր է վերականգնել նոր վարկային միջոցների ներգրավմամբ, քանզի այլ տարբերակ, այլ ռեսուրս, թերևս ներկա դրությամբ, Հայաստանը չունի:
«Կարելի է, իհարկե, նաև Կենտրոնական բանկի պահուստների միջոցով փորձել այս գումարը հետ բերել, սակայն ես դա այդքան էլ նպատակահարմար չեմ համարում, և, ինչպես արդեն նշեցի, հիմնական մեթոդը վարկային միջոցներն են, որի դեպքում, բնականաբար, կաճի պետական պարտքը, սակայն դա, իհարկե, բնական է, քանի որ հիմնականում հենց այդպես էլ լինում է այսպիսի ճգնաժամերի ժամանակ»,- ընդգծեց Հրանտ Միքայելյանը:
Հարցին՝ ընթացիկ տարվա արդեն երկրորդ կիսամյակում տնտեսության վերականգնում կարո՞ղ ենք ակնկալել, թե՞ դինամիկան կրկին բացասական է, Միքայելյանը պատասխանեց, որ այս մասով կանխատեսումներ անելը դեռևս վաղ է:
«Մենք դեռ չգիտենք, թե առաջիկայում կորոնավիրուսի համավարակի հետ կապված զարգացումներն ինչպիսին կլինեն. այս պահի դրությամբ, ճիշտ է, դրական դինամիկա ունենք, վարակվածների վիճակագրությունը հետզհետե նվազում է, սակայն պարզ չէ, թե վիճակն աշնանը ինչպիսին կլինի, ինչ տատանումներ են հնարավոր: Հաշվի առնելով, որ այսօրվա դրությամբ անորոշությունը դեռ շարունակվում է, ուստի տարեվերջի համար կոնկրետ կանխատեսումներ անել չէի ցանկանա, պետք է մի փոքր էլ սպասենք»,- եզրափակեց մեր զրուցակիցը: