«Ազատություն» ռադիոկայանի փոխանցմամբ՝ Միացյալ Նահանգների պետքարտուղարի՝ ժողովրդավարության, մարդու իրավունքների և աշխատանքի հարցերով փոխտեղակալ Թոմաս Մելիան Հայաստանի իշխանություններին կոչ է անում 2008 թվականի մարտիմեկյան իրադարձություններում զոհվածների մահվան հանգամանքների լիակատար հետաքննություն անցկացնել:
Այս մասին ամերիկացի բարձրաստիճան դիվանագետը հայտարարել է ԱՄՆ-ի Կոնգրեսի Ներկայացուցիչների պալատի Եվրոպայի և Եվրասիայի հարցերով ենթահանձնաժողովում՝ «Ժողովրդավարության և ազատությունների վիճակը Արևելյան Եվրոպայում» խորագրով քննարկման ժամանակ:
Ողջունելով ընդդիմադիր Հայ ազգային կոնգրեսի հետ երկխոսություն սկսելու՝ Հայաստանի իշխանությունների ջանքերը, Թոմաս Մելիան հորդորել է այդ ջանքերում ընդգրկել ընդդիմադիր բոլոր կուսակցություններին:
«2008-ի նախագահական ընտրություններին հաջորդած բախումների հետևանքով ազատազրկվածներին ազատ արձակելու՝ կառավարության քայլը ևս դրական զարգացում է: Այդուհանդերձ, մենք կոչ ենք անում կառավարությանը՝ կատարել իր խոստումը և առավել ամբողջական հետաքննություն անցկացնել 10 զոհերի մահվան պատճառ դարձած հետընտրական բախումների հանգամանքները բացահայտելու ուղղությամբ»,- հայտարարել է Միացյալ Նահանգների պետքարտուղարի փոխտեղակալը՝ ընդգծելով նաև մեղավորներին պատասխանատվության ենթարկելու անհրաժեշտությունը:
«Գալիք՝ 2012 թվականի ընտրությունները կառավարության համար կարևոր հնարավորություն են՝ առաջընթաց ցույց տալու ժողովրդավարացմանն ուղղված իր պարտավորությունների կատարման գործում»,- ասել է Թոմաս Մելիան:
Լրատվամիջոցների ազատության թեմային անդրադառնալով՝ ամերիկացի բարձրաստիճան դիվանագետն ընդգծել է բազմակարծության խթանման, անկախ լրատվամիջոցների նկատմամբ՝ «ինչպես, օրինակ, ԳԱԼԱ հեռուստաընկերությունը», ավելի մեծ հարգանքի անհրաժեշտությունը:
Թոմաս Մելիան այս տարվա հունիսին էր այցելել Հայաստան, Ադրբեջան և Վրաստան։ Իր զեկույցում նա անդրադարձել է նաև Վրաստանում, Ադրբեջանում և ևս 8 երկրներում ժողովրդավարության վիճակին:
