Ամերիկյան Stratfor վերլուծական կենտրոնը գրում է, որ Լեհաստանի նախագահն Անդրկովկաս է մեկնել Ռուսաստանի դիրքերի թուլացման համար.
«Լեհաստանն Ադրբեջանի ու Վրաստանի համար կարող է փոխարինել խորհրդային զենքի ավանդական մատակարարներին։ Ադրբեջանը ձգտում է դիվերսիֆիկացնել Ռուսաստանի, Բելառուսի, Ուկրաինայի և Ղազախստանի հետ նրա ունեցած ավանդական ռազմական կապերը։ Ադրբեջանը պատրաստվում է զարգացնել իր բանակը, սակայն նախկին Խորհրդային միության զենք մատակարարող երկրները զենքի առաքումների սահմանափակում են մտցրել։
Բաքուն տվյալ խնդիրը քննարկել է Իսրայելի հետ։ Չնայած դրան՝ նա շարունակում է որոնել ՆԱՏՕ-ի անդամ երկրի, որը պատրաստ կլինի զենք մատակարարել իրեն։ Ճիշտ է՝ Լեհաստանը հրապարակավ չի արտահայտվել դրանում իր հետաքրքրության մասին, սակայն նա այնպիսի երկիր է, որը կարող է մրցակցել Մոսկվայի հետ։ Դրա համար էլ, ադրբեջանական իշխանությունների տեսանկյունից, Լեհաստանն օժտված է խաղի մեջ մտնելու պոտենցիալով։
Վրաստանի առնչությամբ Լեհաստանը ցանկանում է անվտանգության ոլորտում որոշակի աջակցություն ցուցաբերել այժ երկրին, սակայն պետք է մեծ զգուշավորություն դրսևորի՝ հաշվի առնելով Մոսկվայի հնարավոր արձագանքը։
Վրաստանը խեղդված է իր ավանդական զենքի մատակարարներ Ուկրաինայի ու Ղազախստանի սահմանած բեռնարգելքով, և 2008 թվականի պատերազմի արդյունքում իրեն զգում է արևմտյան դաշնակիցների կողմից քաղաքականապես անտեսված վիճակում։
Մոսկվայում Stratfor-ի աղբյուրները հայտնում են, որ Արևմուտքը և մասնավորապես ԱՄՆ-ը ցանկանում են վերսկսել զենքի մատակարարումները Վրաստանին, սակայն Վաշինգթոնը գիտակցում է, որ դա Մոսկվայի հանդեպ շատ համարձակ քայլ կլինի։
Ադրբեջանի նման՝ Վրաստանի իշխանությունները նույնպես անդրկուլիսային բանակցություններ են վարել երրորդ երկրից զենքի մատակարարման վերաբերյալ։ Տվյալ ոլորտում Վրաստանի պոտենցիալ գործընկերներն են Իսրայելը և Լեհաստանը։
Հուլիսի 25-29-ը Լեհաստանի նախագահ Բրոնիսլավ Կոմորովսկին գտնվելու է Անդրկովկասի երկրներում։ Այդ այցի նպատակը «Արևելյան գործընկերություն» ծրագրի շրջանակներում ընդգրկված կովկասյան երեք երկրների հետ ԵՄ-ի համագործակցության ընդլայնումն է։
Ձգտելով այդ երկրներին իր կողմը գրավել՝ Լեհաստանը բախվում է բազմաթիվ խնդիրների հետ։ Կոմորովսկու այցը շատ բանով չի նպաստի ԵՄ-ի հետ տարածաշրջանի մերձեցմանը, փոխարենը ընտրությունների նախաշեմին դրականորեն կազդի Լեհաստանի քաղաքական կյանքի վրա՝ ի ցույց դնելով, որ կառավարությունը Ռուսաստանի հետ հարաբերություններում հակված չէ զիջումների։
Վարշավայի կառավարությունը հուսով է, որ այդ այցը կծառայի իր շահերին և կդառնա այդ երկրներում Ռուսաստանի դիրքերը թուլացնող փոքրիկ խորհրդանշական քայլ։ Քաղաքական առումով Լեհաստանի և Արևմուտքի համար ամենադժվար պետությունը Հայաստանն է՝ «Ռուսաստանի հաճախորդ»-ը»։