Համաշխարհային առաջնորդների, բրիտանական թագավորական ընտանիքի, երաժշտության և կինոյի աստղերի ամենավառ մոմե արձանները Լոնդոնի «Մադամ Տյուսոյի» թանգարանից համընդհանուր ցուցադրության են դրվել Լոնդոնի կենտրոնում, հայտնում է Daily Mail- ը:
Անցորդները կարող են տեսնել Մեծ Բրիտանիայի Եղիսաբեթ երկրորդ թագուհու, արքայազն Հարիի և Մեգան Մարքլի, ԱՄՆ նախագահ Դոնալդ Թրամփի և Մեծ Բրիտանիայի վարչապետ Բորիս Ջոնսոնի, դերասան Դուեյն Ջոնսոնի, երգիչներ Թեյլոր Սվիֆթի և Բեյոնսեի մոմե արձանները:
Բոլոր արձանները դիմակներով են և տեղադրված են իրարից սոցիալական հեռավորության հաշվարկով։
Դրանք գտնվում են Մադամ Տյուսոյի թանգարանի դիմաց՝ դրա բացման նախաշեմին: Պատկերասրահը փակվել էր մարտի 20-ին՝ կորոնավիրուսի համավարակի պատճառով:
Մոմե արձանների աշխարհի ամենահայտնի թանգարանը հիմնադրվել է Լոնդոնում 1835 թ.-ին՝ քանդակագործ Մարի Տյուսոյի կողմից: Թանգարանն աշխարհով մեկ 23 մասնաճյուղ ունի։
