Սահմանադրական դատարանի դատավորի պաշտոնում Կառավարությունն առաջադրել է Վահրամ Ավետիսյանի թեկնածությունը, հաջորդ թեկնածուին կառաջադրի ՀՀ նախագահը, երրորդին՝ Դատավորների ընդհանուր ժողովը: Մի շարք իրավապաշտպաններ, փաստաբաններ և հատկապես Մարտի 1-ի արյունալի դեպքերից հետո քաղաքական դրդապատճառներով ձերբակալված մի քանի տասնյակ մարդիկ դիմում են Կառավարությանը՝ հորդորելով հետ կանչել Վահրամ Ավետիսյանի առաջադրումը: Առանցքային պատճառներից մեկն այն է, որ դատավորի թեկնածու Վահրամ Ավետիսյանի հայրը՝ Դավիթ Ավետիսյանը, նախկինում զբաղեցրել է Վճռաբեկ դատարանի քրեական գործերով պալատի նախագահի պաշտոնը, և, օրինակ, մարտիմեկյան տուժողի կարգավիճակ ունեցողներն ու նրանց պաշտպանները հայտարարում են, որ նա դակել է մարտիմեկյան գործի նախկինում եղած դատավճիռները:
Թեմայի շուրջ «Առաջին լրատվական»-ի հետ քննարկմանը մասնակցեցին իրավապաշտպան Ժաննա Ալեքսանյանը, նախկին քաղբանտարկյալներ Արամ Բարեղամյանը և Գրիգոր Ոսկերչյանը:
Հարցը ոչ թե Վահրամ Ավետիսյանի մասնագիտական կարողություններին է առնչվում, այլ բարոյակա՞ն դաշտում է: Այս հարցին ի պատասխան՝ Ժաննա Ալեքսանյանը նշեց, որ Վահրամ Մարտիրոսյանի մասնագիտական կարողությունների մասին հասարակությունը տեղյակ է միայն իր գրառումներից. «ՍԴ դատավորի այս թեկնածուն շատ վատ ներկայացավ՝ հավակնոտ մարդու գրառումով: Բացի դրանից, նա իրեն քննադատողներին որակավորումներ տվեց, մարդկանց տեսակավորեց»:
Գրիգոր Ոսկերչյանը նշեց, որ Դավիթ Ավետիսյանը մի քանի տասնյակ դատավճիռներ է դակել՝ մարդկանց և նրանց ընտանիքներին ենթարկելով զրկանքների: «ՍԴ դատավորի թեկնածու ընտրելուց առաջ պետք է հաշվի առնել, թե թեկնածուն և իր ընտանիքը քանի ընտանիքի է զրկանքների ենթարկել: Հույս ունեմ, որ Վահրամ Ավետիսյանի թեկնածությունը չի հասնի ԱԺ քվեարկության փուլ»:
Արամ Բարեղամյանն ընդգծեց, որ հանրությունը նոր ձևավորվող ՍԴ-ից մեծ ակնկալիքներ ունի և ՍԴ դատավորներից բարձր պահանջներ ունի, մինչդեռ այս թեկնածուն չի բավարարում այդ պահանջները…
Քննարկման մասնակիցների դիտարկմամբ՝ եթե իշխող ուժը կողմ քվեարկի Վահրամ Ավետիսյանին, ուրեմն սա պարտադրված թեկնածու էր. հեղափոխությունը կավարտվի:
Մանրամասն՝ տեսանյութում:
