ՀՀ կառավարությունը Սահմանադրական դատարանի դատավորի թեկնածու կառաջադրի Վահրամ Ավետիսյանին։ Վահրամ Ավետիսյանը հասարակությանն անհայտ էր, մինչև պարզվեց, որ նա Վճռաբեկ դատարանի քրեական պալատի նախագահ Դավիթ Ավետիսյանի որդին է։
Դավիթ Ավետիսյանը հանրության հիշողության մեջ մնացել է Մարտի 1-ի վճիռները դակելով։ Այս հանգամանքն արդյոք չպիտի՞ կաշկանդի իշխանությանը․ «Առաջին լրատվական»-ի հարցին Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը պատասխանեց․ «Գիտեք, այդ խնդրի հետ կապված տարատեսակ մեկնաբանություններ հնչեցվեցին, գնահատականներ հնչեցվեցին թեկնածուի ծնողի հետ կապված։ Ես կասեմ, թե ինչպես եմ պատկերացնում նման խնդիրների լուծումները։
Առաջինը՝ պետք է լինի թափանցիկ գործընթաց։ Այսինքն՝ հանձնառությունն իշխանության, որ իր կողմից գործողությունները քաղաքացիների առջև պետք է լինեն թափանցիկ և վստահություն ներշնչող, այն պետք է իրականացվի, ապահովվի ամեն մի քայլի, ամեն մի որոշման ժամանակ։ Տվյալ պարագայում թեկնածուի որոշման գործընթացը եղել է ոչ թափանցիկ, ավելին՝ հայտնի չէ նաև, թե որոնք էին այն չափանիշները, որոնց համաձայն՝ հենց այդ թեկնածուն է առաջադրվել։ Իհարկե, Սահմանադրությամբ և օրենսդրությամբ սահմանված են այն չափանիշները, որոնց պետք է համապատասխանի Սահմանադրական դատարանի դատավորի թեկնածուն, բայց ընտրության հետ կապված պետք է լինեն բոլորովին այլ չափորոշիչներ, որոնց հիմքում պետք է լինի բարեվարքությունը․ հանրության կողմից վստահելի այն չափանիշները, որոնց պարագայում թեկնածուն ընդունելի կլինի։ Ավելին՝ հայտնի չէ նաև, թե ով է առաջադրել թեկնածուին, որտեղից հայտնվեց նա, և ինչու հենց այդ մարդը և ոչ թե մեկ այլ թեկնածու։
Ես կարծում եմ, որ այս թեկնածուի որոշման ոչ թափանցիկ, ոչ մասնակցային, ոչ հաշվետու լինելն արդեն իսկ ստեղծում է անվստահություն այդ գործընթացի նկատմամբ»։
Մանրամասները՝ տեսանյութում։
