ՀՀ ԱԺ «Ժառանգություն» խմբակցության պատգամավոր Զարուհի Փոստանջյանը, «Առաջին լրատվականի» հետ զրույցում գնահատելով ՀԱԿ-իշխանություն երկխոսությունը, նշեց.
«Մինչ այսօր մեզ չի հաջողվել իրական ընտրություններ անցկացնել, և բոլորիս նպատակը պետք է լինի իրական ընտրությունների անցկացումը։ Կարող եմ ասել, սակայն՝ նախադրյալներ կան, որ ընտրություններ տեղի չունենան։ Այդ նախադրյալներից մեկն էլ նոր Ընտրական օրենսգիրքն է, որի հետևանքով արդեն իսկ նշանակվել են ԿԸՀ անդամները, որոնցից երկուսի նշանակումը արդար և թափանցիկ չի եղել։ Եվ բացի այդ, ոչ միայն պետք է ունենալ լավ ընտրական օրենսդրություն, այլ նաև անկախ պետական համակարգ։ Մինչդեռ մենք գիտենք, թե ինչպես է Սահմանադրական դատարանը ակնհայտ կեղծիքներով ընտրություններ անցկացնում։ Իսկ եթե գոյություն չունի անկախ դատական համակարգ, հետևաբար ես թերահավատ եմ ընտրությունների անցկացման հարցում»։
Անդրադառնալով ՀԱԿ-ի կողմից արտահերթ ընտրությունների պահանջի հնարավոր բավարարմանը՝ Զ.Փոստանջյանը հայտնեց, որ պահանջի բավարարումն այս իշխանությունների համար էական նշանակություն չունի, և որ նրանց համար էական է իրենց վերարտադրությունը. «Ամենակարևոր խնդիրը, որ իշխանությունը ցանկանում է լուծել, իր վերարտադրության խնդիրն է։ Իսկ վերարտադրության համար որ ճանապարհը դյուրին լինի, նրանք հենց այդ ճանապարհն էլ կօգտագործեն։
«Առաջին լրատվական»-ի հարցին, թե «Ժառանգություն»-ը ինչ ձևաչափով է պատրաստվում հանդես գալ առաջիկայում, Զ.Փոստանջյանը պատասխանեց. «Ձևաչափը կորոշի «Ժառանգության» վարչությունը, և այդ մասին հանրությանը անպայման տեղյակ կպահվի»։