Անցած գիշեր և այսօր հայ-ադրբեջանական սահմանին հարաբերական անդորր է, փոխարենը տարօրինակ իրավիճակ է Բաքվում. երեկ գիշեր Ալիևին աջակցող ցույցը անսպասելի ավարտ է ունեցել՝ ոստիկանության և հատուկ ջոկատայինների հետ բախումով: Փորձենք հասկանալ՝ ինչ է տեղի ունենում, ինչից պետք է զգուշանանք: Թեմայի շուրջ «Առաջին լրատվական»-ի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, ԱԺ «Իմ քայլը» խմբակցության պատգամավոր Վիկտոր Ենգիբարյանը և «Անտարես» հրատարակչության տնօրեն Արմեն Մարտիրոսյանը:
Ազատ Արշակյանի դիտարկմամբ՝ Ադրբեջանում անկառավարելիության սպառնալիք կա, ինչն, իհարկե, վտանգավոր է մեզ համար. «Վատ կառավարվող երկիրը բռնապետությունից վատ է: Ժողովրդավարական երկիրը լավն է, քանի որ ունի արժեքային համակարգ և գաղափարախոսություն, դա հումանիզմն է, իսկ բռնապետությունը կախված է բռնապետների խմբի այդ պահի շահից, որը վտանգավոր է, անընդհատ պետք է զգոն լինել այդպիսի հարևան երկիր ունենալու դեպքում: Իսկ երբ որ երկիրն անկառավարելի է, ավելի վտանգավոր է, քանի որ հնարավոր չէ կանխատեսել, թե ինչ տեղի կունենա: Ադրբեջանում՝ այդ խանությունում, ներքին՝ կլանային խնդիրներ կան… Ռուսաստանի ռեսուրսները բավարար չեն Ադրբեջանում կարգուկանոն հաստատելու համար»:
Բաքուն իշխանության ճգնաժամ է ապրում: Արմեն Մարտիրոսյանի դիտարկմամբ՝ Բաքվում արհեստական ցույց արեցին, որ իրենց առջև ծառացած խնդիրները լուծեն… «Այսպիսի խժդժությունները հնարավորություն են տալիս հակառակորդին օգտվել դրանից: Մեր երկրում այդպիսի խժդժություններ չպետք է թույլ տանք. մեր ուժը մեր հավաքականության ու զգոնության մեջ է»:
Ազատ Արշակյանը հավելեց, որ Բաքվի ցույցը ինքնաբուխ չէր, կազմակերպված էր:
Անդրադառնալով դիտարկմանը, որ Բաքուն նախաձեռնեց և տուժեց իր իսկ նախաձեռնած քայլից՝ Արմեն Մարտիրոսյանը նշեց. «Հակահարվածը պետք է լինի ավելի ցավոտ, քան հարվածը»: Նա նաև հավելեց, որ հավերժական թշնամիներ ու բարեկամներ չկան. պետք է գտնենք նոր դաշնակիցներ:
Ազատ Արշակյանը հակադարձեց՝ նշելով, որ մենք դաշնակից պետք է փնտրենք այնտեղ, որտեղ մեզ ընդունում են, ոչ թե դահճի կամ ավազակի հետ, որոնք մերժում են մեր գոյության իրավունքը»:
Անդրադառնալով դիտարկմանը, որ ԱՄՆ-ը Կոնգրեսը կքննարկի Ադրբեջանին ցուցաբերվող պաշտպանական աջակցությունը դադարեցնելու մասին հարցը՝ Ազատ Արշակյանը նշեց, որ ստեղծված իրադրությունը նույնպես նպաստեց դրան. «Ընդհանրապես մերոնք աշխատում են տարբեր երկրներում… Կարևորն այն է, որ ԱՄՆ-ը զսպում է մեր հակառակորդին»:
Մանրամասն՝ տեսանյութում:
