Կտրուկ սրվել է իրավիճակը հայ-ադրբեջանական սահմանի տավուշյան հատվածում: Սահմանային լարվածության, դրա վերաբերյալ միջազգային արձագանքի և ՀՀ ազգային անվտանգության նոր ռազմավարության շուրջ «Առաջին լրատվական»-ի հետ քննարկմանը մասնակցեցին «Հանուն հանրապետության» նախաձեռնության անդամներ, քաղաքագետ Ռուբեն Մեհրաբյանը, միջազգայնագետ Սարգիս Գրիգորյանը և սահմանադրական իրավունքի մասնագետ Արտաշես Խալաթյանը:
Սարգիս Գրիգորյանի համոզմամբ՝ նոր աշխարհակարգի ձևավորման փուլ է, նախկին պայմանավորվածություններն ու համաձայնությունները վերանայվում են, նոր իրողություններ ու նոր խաղի կանոններ են ի հայտ գալիս. «Սահմանային լարվածությունը զարմանալի չէ, քանի որ Ադրբեջանը մշտապես ռազմատենչ հայտարարություններով է հանդես եկել ու չի թաքցրել իր նպատակները… Եվս մեկ անգամ համոզվեցինք, որ այս երկիրը հետ չի կանգնել իր բիրտ, ռազմատենչ վարքագծից»:
Միջազգային հստակ արձագանք դեռևս չկա: Արտաշես Խալաթյանի կարծիքով՝ միջազգային հարաբերությունների առանցքային դերակատարները դեռևս ցանկանում են մարսել տեղի ունեցողը: «Ամենահստակ դիրքորոշումը հայտնել է Թուրքիան, որը հանդես է եկել որպես Ադրբեջանի այս արկածախնդրության, եթե չասենք հովանանվոր, ապա ջատագով, և հայտնել է իր սատարումը Ադրբեջանին՝ հակամարտության հետագա ցանակացած զարգացաման առումով: Ադրբեջանը, լինելով անդրկովկասյան հանրապետություն, շարունակում է մնալ օտար մարմին, և թուրքական շահերի պրովայդերն է: ՀԱՊԿ-ը անկանոն արձագանք տվեց, անորոշ ժամանակով հետաձգեց հայ-ադրբեջանական հարցի քննարկումը ՀԱՊԿ խորհրդի նիստում. սա ցույց է տալիս, որ ՀԱՊԿ-ում նույնպես թուրքական շահը գերակայում է: Հայասատանը հույսը պետք է դնի իր սեփական ուժերի վրա և ինքը կերտի իր անվտանգությունը: ՀԱՊԿ-ը մեզ չի աջակցում, արդեն մեկ դար է գործում է թուրք-ադրբեջանական տանդեմը և Ռուսաստանի երկակի՝ «и нашим и вашим» սխեման»:
Թուրքիան հայտարարել է, որ աջակցելու է Ադրբեջանի տարածքային ամբողջականությունը վերականգնելուն: Թուրքիան ակնհայտորեն աջակցում է Ադրբեջանին որպես դաշնակից, որպես գաղափարակից, գուցե բացի բարոյահոգեբանական աջակցությունից նաև ռազմատեխնիկական աջակցություն ցուցաբերելու ուղղությամբ է քայլեր անում, բայց իրենց պատկերացրած տարածքային ամբողջականությանը հասնել գործնականում հնարավոր չէ. «Դա հնարավոր է միայն ներխուժմամբ և այնտեղից հայերի բռնագաղթեցմամբ, ինչը հայ ժողովուրդը թույլ չի տա»:
Քննարկման մասնակիցների դիտարկմամբ՝ Ազգային անվտանգության նոր ռազմավարությունը հեղափոխական փաստաթուղթ է, այն կդառնա Հայաստանի անվտանգային քաղաքականության ուղեցույցը:
Մանրամասն՝ տեսանյութում: